Nakorsaq: Atugarissaarneq innuttaasut toqqissisimanerannut tunngavoq
”Atugarissaarneq innuttaasut isumaginninnikkut aningaasaqarnikkullu toqqissisimanerannut tunngavoq. Ilaqutariinni alliartorneq inuiaqatigiillu meeqqanik paarsinermut, ineriartornermut ilinniartitsinermullu pilliutigisartagaat ukiuni qulikkaani tullerni salliutinneqartariaqarput”.
Nuummi nakorsaq Gert Mulvad oqarpoq.
Taamaaliussaguttalu politikerit allaanerusumik eqqarsartariaqarput, pisortaqarfiit akunnerminni suleqatigiinnerulersillugit, Gert Mulvad nangippoq.
- Ilaqutariinnik ajornartorsiortoqartut ilisimavarput. Meeqqanik sumiginnaasortaqartartoq ilisimavarput. Ajornartorsiutit anigorniarlugit sulisoqarpoq, kisianni ilorraap tungaanut ineriartornernik suli takusaqanngilagut.
Taamaammat aaqqissuussisimanigut misissortariaqarpagut. Ilaqutariit ajornartorsiutitik nammineerlutik iluarsisinnaanngikkaangatigit inuiaqatigiillu ikiuuttariaqaleraangata, taava pisortaqarfiit naleqquttumik aaqqissuussimanerpagut.
Aperisariaqarpugut, aaqqissuussinerit sorliit iluarsisariaqarpat, Gert Mulvad aperivoq.