Nakorsapalaat unitsissinnaalissavaat
Paasissutissat tamakkunnga tunngassuteqartut siusinaartumik paasineqartalernissaat, nunani avannarlerni isumaqatigiissutigineqartoq, nunatta nakorsaaneqarfianit ilassilluarneqarpoq.
- Kalaallit Nunaat ukiut ingerlaneranni nakorsanik napparsimasunillu paarsisunik, ajornartorsiuteqartunik imaluunniit arlaatigut paasisaanngujuulersunit kajungerineqarluartarsimammat isertuunneqarsinnaanngimmat paasissallugu pingaaruteqarpoq. Siusinaarluta tamakku paasinerisigut maannartinnissaat pinngitsoorsinnaavarput, nakorsaaneq Flemming Stenz oqarpoq.
Taassuma aamma oqaatigaa nakorsanik napparsimasunillu paarsisunik assersuutigalugu naammagiittaalliorfigitissimasunik atorfininnissaat sioqqullugu paasinninnissamut atortussaminnik amigaateqarsimallutik.
- Soorunalimi paaserususavarput atorfinitsinniakkavut pisinnaasamikkut kissaatigineqartumit piginnaanikinneruppata. Aappaattullu inuit sukkut arlaatigut atornerluisuusimagunik; taava taakku ilai isumaqartarput, Kalaallit Nunaanni suliffittaarunik annassutigisinnaallugu, Flemming Stenz oqarpoq.
Maanga nunamut nuuginnaraanni ajornartorsiutit qaangiunnissaannik kukkusumik isumaqatarneq, suleqateqarpiannginnermik kisimiilluniluunniit sulinermik pissuteqartumik isertorluni nakorsaatinik atornerluinissamut periarfissaqarluarnera nakorsaaneqarfimmiit misilittagaqarfigineqarpoq.
Taamaakkaluartoq Flemming Stenzip oqarneratut inuit sanngiitsut qaqutigooraluartut napparsimasut pitsaanerusumik siunissami illersorsinnaalernissaat pingaaruteqarluinnarnera oqaatigaa.
- Ilaatigut nakorsaqarfimmi kisimiilluni nakorsatut sulisoqartarmat pingaaruteqarpoq napparsimasunut uloriarnartorsiortitsilersinnagit tamakku paasinissaat, nakorsaaneqarfimmi pisortaq Flemming Stenz oqarpoq.
Suliassaq kingulleq pivoq ukioq kingulleq peqqinnissaqarfimmi sulisoq atornerluineq pissutigalugu angerlartinneqarmat. Nakorsaanerulli immikkuualuttortai iserfigerusunnagit oqarpoq.
Danskit oqartussat maannakumuugallartoq kisiartaallutik nunani avannarlerni suleqatitik danskit nakorsaat pillugit paasissutissanik tuniussisarsimapput, taamatulli suliniuteqarneq nunani allani peqqinnissaqarfinnik sulisunut aamma atuutsinneqalissaaq.
