Nakorsanik sulililivittussanik perusukkaanni atugarisatigut tapersersortariaqarput

Nakorsat aalajangersimasumik sulisussat pissarsiariniassagaanni pisariaqarpoq, nakorsat nuuttussat aningaasarsiaat kisiisa eqqarsaatiginagit, ilaqutariittut inuunerminni allanngortitsinissaannut tapersersussallugit, ilinniaqqinnissaannullu periarfissaqartissallugit, Kalaallit Nunaanni nakorsat peqatigiiffianni, Grønlands Lægekredsforeningimi siulittaasoq, Thomas Stensgaard oqarpoq:

- Ullumi oqaatigineqartutut nakorsatut atorfiit aalajangersimasunik inuttallit amerlanngillat. Tamatumalu kinguneraa taartaasartut piffissami sivikinnerusumi sivisunerusumiluunniit amerlasuut atortariaqartaratsigit. Taamaaliortariaqartarnerpullu

napparsimasunut nakorsanullu aalajangersimasumik atorfilinnut toqqissisimajunnaartitsisarpoq, Thomas Stensgaard oqarpoq.

Taassuma aamma oqaatigaa, nakorsanik aalajangersimasunik inuttaliisinnaannginneq arlalinnik pissuteqartoq, tassalu aningaasarsiat amerlinissaannut periarfissaqarpat piumassuseqartoqarpallu aalajangersimasumik atorfinikkusuttut arlaqarnerulersinnaanerat ilimanarsinnaasoq, kisiannili aningaasarsiat qaffannerisa kisimi ajornartorsiut aaqqinnavianngikkaa aamma erseqqissaatigaa:

- Nakorsat ilinniaqqiffissaminnut periarfissaqartariaqarput, aamma aapparisap meerarisallu toqqissisimanartumik atugaqartinnissaat, qulakkeersimasariaqarpaat, Kalaalllit Nunaanni nakorsat peqatigiiffianni siulittaasoq, Thomas Stensgaard oqarpoq.

Kalaallit nakorsatut ilinniarsimasut, ukiuni kingullerni nunatsinnut utertartut amerliartorujoortut, aamma ilinniaqqinnissaminnut periarfissagissaartitaanissaasa qulakkeerneqartariaqarnerat, Thomas Stensgaardip pingaartinneqartariaqarnerarpaa.