Nakorsaatitorneq kinguneqarnerlussinnaasoq

Sajunnermik nappaatillit nakorsaatitornerminni pisiortorumatuneq, aningaasanoornermik uerineq tiingarusunnerlu ingasattajaaginnartoq nappaammik qaavatigut akornutigilersinnaavaat.

Århus Universitets Hospitalimi ilisimatusartut aqutsisuat, Arne Møller, oqarpoq.

- Napparsimasut allaat ilaquttaminnik suliffimminnillu annaasaqarsinnaasut, ilami pinerluttunngorsinnaallutillu parnaarussaallutik. Inunnut akulerusimajunnaariartortarput inuunerallu nalikinnerulersinnaalluni, Arne Møller nassuiaavoq.

Sajunnermik nappaateqartut 100-gaangata taakkunannga arfineq-pingasut eqqarsaqqaarnatik periartarnermik akornuteqalersinnaapput nakorsaaniartullu tamanna ilisimasakiffigivallaarpaat.

- Ilisimasaqarfiginerulissallugu pikkorippallaarsimanngilagut, ukiuni arfineq-pingasuni tamanna pillugu ilisimalersimasat saqqummersinneqartut 100-it missaanniipput taamaakkaluartorli ajornartorsiut suli iluamik paasiniarneqarnani, Arne Møller oqarpoq.

Sajunnermik nappaammut nakorsaatitortarnerup aningaasanoornermik uerisitsisinnaanera pillugu Arne Møller paasiniaaqataavoq.

- Paasineqarnerunissaa anguniarparput. Nakorsaatip sunniutaa iluaattoq nakorsaasersuisut sajunnermillu nappaatillit tamarmik ilisimassagaat anguniarparput.

Sajunnermik nappaatillit ukiukinnerusut, tassa 40-it missaanniit ukiullit, aningaasanoornermik uerisinnaapput.

Kalaallit arlaqartut aamma sajunnermik nappaateqarput. Ukioq 2000-imi nakorsaanerup Lene Wermuth-ip annertuumik misissuineratigut paasineqarpoq kalaallit savalimmiormiullu, danskinut sanilliullugit, sajunnermik nappaateqarnermik eqqorneqarsinnaanerat ilimanaateqarnerusoq.

Kalaallit sajunnermik nappaateqartut Danmarkimi napparsimmavinnit malinnaavigineqartuarput ukiullu aappassaani Danmarkimi nakorsamit misissorneqartarlutik, nakorsaq Ole Gredal nunatsinneeqqammersoq oqarpoq. Taassuma kalaallit 50-it missaanniittut sajunnermik nappaateqarnerarpai.