Nakorsaatit amerlanersaat inuiaqatigiit akilertassagaluarpaat
Inuusuttut aalajangiisussaagaluarpata, nakorsaatit amerlanersaat iuiaqatigiit namminneq akilertassagaluarpaat.
Inuusuttut Inatsisartuisa, ulluni makkunani katersuuttut, oqallinneranni tamanna takutinneqarpoq. Inatsisartutut politikki oqallisigivaat – inatsisinik allanngortitsisinnaanngikkaluarlutik.
Inuusuttut, Nuummi GU-minngaanneersut,
Britt Nielsen aamma Lenia Larsen, oqallinnermut malinnaatikkiartorlugit Radioavisimi tusagassiortut nassiuppaat:
Siunnersuut Inuusuttut Inatsisartuiniit tunniunneqartoq naatsumik oqaatigissagaanni tunngavigivaa: nakorsaatit nalinginnaanerusut – soorlu P-Pillit nipaallisaatit, cremmillu – akeqalertinnissaat. Ukiut tamaasa Namminersornerullutik Qqartussat aningaasat tyve millionit sinnerlugit nakorsaatinut atortarpaat. Tamannalu ukiumit ukiumut alliartorpoq. Nuup illoqarfiani aallartippugut apersuiartorluta inuit namminneq nakorsaatit akilertalissagaluarunikkik qanoq isummaqarfigineraat.
Ilaasa tamanna ajoriffissaqartinngilaat, tassamigooq nakorsaaterpassuit akilerlugit massakkut akilerlugit pisiarisalernikuugatsigik. Ilaalli oqarput taama siunnersuuteqartut qinernaviarnagit, aamma taamaaliussagutta nakorsaatinut atorneqarnerpaanut akiliisalernissatsinnut akissaqannginnatta. Apersukkatta ilaat isumaqarpoq, nakorsaatinik aalliinnarsinnaaneq inuppassuit taamaattussaannartut isigilersimagaat, tamakkuli aamma akeqarmata inuit namminneq aamma akiliisalertariaqartut.
Siunnersuut Sussi Faurskov-imit Nuummi Ilinniarfissuarminngaanneertumit tunniunneqarpoq:
Taassuma pissutiginerarpaa siunissami namminersulernissatsinnut piareersarsinnaasariqarnerput. -Tamakkununnga sungiussinissatsinnut piareersalereertariaqarpugut, taamaaliorutta uagutsinnut oqinnerussaaq, Sussi Faurskov oqarpoq.
Siunnersuut Inuusuttut Inatsisartuinit ajunngeqisumik tiguneqarpoq – Taamaattumik Sussi Faurskov neriuuteqarluarpoq siunnersuutip siunissaanut tunngatillugu.
Inuusuttut Inatsisartuisa ataatsimeeqattaarnertik sisamanngorpat tungaanut ingerlatissavaat.
