Nakorsaatinut Canadami akiliisalissagunarput
Canadami naalakkersuisut Canadamilu nunap inuii kingumut isumaqatigiikkunnaarallarput.
Eqqillit nunap inuiilu nakorsaatinik atuisariaqalissagaangamik taakku aatsaat akiliillutik pisinnaalissagunaraat, peqqinnissaqarfimmiit nalunaarutip nutaap nassatarissagunarpaa.
Canadamiut nakorsaatinut akiliinatik manna tikillugu pisinnaagaluarput, soorlu Kalaallit Nunatsinni aamma taamaattoq.
Nunavummi Nunavimmilu nakorsaataarniarfinnut naalagaaffimmit tapiissutaasartut ilanngarneqarnissaannik nalunaarusiaq naalakkersuisunit atsiorneqaqqammerpoq. Nunavummi Nunavimmilu nunap inuiinut eqqilinnullu nakorsaatit akeqanngitsunik tunniunneqartaraluarput.
Yukonimi nakorsaataarniarfimmi nakorsaasiortoq oqaluttuarpoq, tapiissutit ilaatigut affaannanngortinneqartut, nakorsaasiortullu allamik periarfissaarullutik, akiligassat atuisuminnut allatut ajornartumik nassiussortariaqartalissagitik, naak taakku akeqanngitsumik nakorsaaserneqartaraluartut.
Canadami nunap inuiinut 750.000-it missaanniittunut nakorsaatinut tapiissutit 3,5 milliardi koruunit Canadami peqqinnissaqarfiup 2004-mi atorpai.
Nakorsaasiortut oqaluttuarput, nakorsaatit tunniunneqartarnerannut allannguuteqassanersoq atuisorpassuaminnit ernummatigineqaqisoq, ataatsilli, naalakkersuisunik isumaqatiginninniartup, neriuutigigaa, arlaannik aaqqiissutissamik piffissaq kingullerpaaq atorlugu isumaqatigiittoqarsinnaassasoq. Canadami naalakkersuisut oqaaseqarusunngikkallarput.
