Nakorsaat nutaaq neriuutissaqalersitsivoq
Aasami seqinnersumi seqinnisaarlunilu feeriarnissaq qanilliartorpoq, taamatulli seqinertitsigigaanni amikkut kræfteqalersinnaaneq, annissatigullu ulorianaatilimmik kræfteqalernissaq qaninnerulersarpoq.
Taamatut kræfterneq timimut siaruaatereersimatillugu manna tikillugu neriuutissaqarnartarsimanngikkaluarpoq. Nakorsaalli nutaaq USA-mi ineriartortinneqartoq nutaamik neriuutissaqalersitsivoq, taama oqarpoq Lars Fastholt, Odense Universitets Hospitalimeersoq.
- Tamanna assorsuaq iluatsitsineruvoq, tassami annissatigut kræftip siaruaattarneratigut kræfteqalersartunut siornatigut nakorsaatissaqartarsimannginnatta ajorunnaarsitsisinnaasumik, Lars Fastholt oqarpoq.
Lars Fastholt suleqataalu nakorsaammik Ipin Immun Abimik ineriartortitsinermut peqataasimapput. Nakorsaatip ukiut pingasut sinnerlugit misilittarneqarnerani napparsimasut 15 procentii ajorunnaarsimapput malunnartuerullutilluunniit.
Tamanna immaqa soqutaarpianngikkaluarpoq, napparsimasunulli siornatigut neriuutissaqarpiarsimanngikkaluartunut allarluinnaalluni.
Nakorsaalli nutaaq qanoq sunniuttarpa?
- Timitta illersuutissaanik kigaallisitsisarpoq, nakorsaallu immikkut kinguneqartitsisutut ittarluni, Lars Fastholt oqarpoq.
Kræftens Bekæmpelsemi nakorsaanerup Iben Holtenip aamma nakorsaatip kingunerisartagaasa annertunerunerat maluginiarpaa, taassumali aamma nakorsaatip neriunaateqarluarnera pingaarnerutillugu.
Kalaallit Nunaat ilaatigut Nunani avannarlerni kræfterlutik paasineqartuni toqusoqarfiunerpaasarpoq. Tamanna kisitsisitigut Nordisk Statistisk Årbogimeersutigut takuneqarsinnaavoq. Immikkut paasisimasallit siornatigut uparuaasaraluarput tamatumunnga pissutaasoq immaqa tassaasoq nappaatip paasineqartarnerata kingusinaartarnera. Aammattaaq tupatorpallaarneq toqusut amerlavallaarnerannut sunniuteqartartoq, immikkut paasisismasallit uparuarpaat.
