Nakorsaasiorfissuaq eqqartuussisunut tunniuppaat

Allattoq Mads Lynge
juunip 05-at 2007 11:43

Nigeriami naalakkersuisut nunarsuarmi nakorsaasiorfiit annersaasa ilaat Pfizer eqqartuussisunut suliassanngortissimavaat. Nigeriap Pfizer pisuutippaa qaratsap ameraasaanik aseruuttoornermut meningitis-imut nakorsaammik akuerisaanngitsumik meeqqanut 200-nut misileraatigalugu atuisimasutut aamma 38 milliardi koruuninik taarsiiffigeqqullutik. Unnerluussisut naapertorlugit meeqqat arlallit nakorsaammik misileraanerup kinguneranik toqusimapput.

Misileraanerit 1996-imi Nigeriap avannaani napparsimmavimmi ingerlanneqarput. Inuit tamaani inuppassualimmi ipertuumi kiaqisumilu najugaqarput, taamalu taamanikkut meningitis-ip atugaaqisup tuniluunnissaa periarfissarissaarluni, tamannalu innuttaasut sungiusimavaat.

1996-imi allatut pisoqarpoq. Illoqarfimmiut oqarfigineqarput meningitis-imut nakorsaammik akeqanngitsumik napparsimmavimmut aallersinnaasut. Nakorsaallu taanna agguaanneqartoq suliniaqatigiiffimmit uanngaanneersuusoq: “Læger uden grænser”.

Kisianni taamanikkut radiukkut oqaatigineqanngilaq Amerikamiut nakorsaasiorfissuat Pfizer nakorsaatissamik sakkortuumik meeqqanut meningitis-ertunut misileraaniarluni aamma napparsimmavimmiimmat.

Taamatut misileraaniaraani angajoqqaat allakkatigut akuersiseqqaartariaqarput. Pfizerilu taamaaliorsimanngilaq tassa angajoqqaat allassinnaanatillu atuarsinnaanngimmata. Nakorsaasiorfissuarmit oqaatigineqarpoq nakorsaat Amerikami misilerarneqareersoq Nigeriamilu oqartussanit akuerineqarsimallutik aamma napparsimmaviup pissuserissaarnissaq pillugu ataatsimiititaliaa akuersisimasoq.

- Tamanna ilumuunngilaq, napparsimmaviup pisortaa oqarpoq.

Oqaatigineqassaaq nakorsaat Europami Amerikamilu taamanikkut atorunnaarsinneqareersimammat, napparsimasut tingummikkut ajoquserujussuarneqartarnerat pissutigalugu, taamalu napparsimasut ilaasa toqqutigisarmassuk. Taamaattorli Pfiserip misileraanini ingerlassimavaa. Nakorsaasiorfissuup misileraanerata kinguneranik meeqqat aqqanillit toqupput. Amerlanerusut qaratsamikkut ajoquserneqarput, timimikkut nukillaartinneqarlutik allatigulluunniit innarlerneqarlutik.