Sisimiuni aasaq manna siusinnerusukkut coronamik tunillatsissimasoqarnikuuvoq - nunatsinnilu illoqarfiit annersaata aappaani maanna tunillatsissimasoqaqqilerpoq.Assi: KNR / Malik Brøns

Nakorsaanerup Sisimiuni tunillatsissimasoqaqqilernera uppernarsaraa

Sisimiut napparsimmaviup matui matuneqarput. Nakorsiarniaruit sianeqqaassaatit.

Sisimiuni coronamik tunillatsissimasoqaqqippoq.

Tamanna nakorsaanerup, Henrik L. Hansenip KNR-imut uppernarsarpaa.

Qassit tunillatsissimanersut nakorsaanerup suli ilisimanngilaa. Nakorsaaneqarfiulli pisoq maanna misissuiffigileruttoraa pisortatigoortumillu ullumi kingusinnerusumi nalunaaruteqartoqarnissaa paasissutissiissutigaa.

Peqqinnissaqarfik qeqqata matut parnaarneqartut Facebookikkut nalunaarutigaa.

 

 

- Sisimiuni Covid-19-imik tunillatsisimasoqarnera peqqutaalluni matut parnaarneqarput, uninngasunullu pulaarsinnaaneq unitsinneqarallarluni, Sisimiuni Peqqinnissaqarfik Qeqqa nalunaaruteqarpoq.

Nakorsiarniaruit napparsimmaviup oqarasuaataanut 86 42 11-mut sianissaatit sulisumullu isumaqatigiissuteqarlutit.

Tunillatsissimasut nutaat arfineq-pingasut ippassarmit paasineqartut ullumi siusinnerusukkut nalunaarutigineqarpoq – taamaalilluni tunillatsissimasut 46-lerlutik. Sisimiuni tunillatsissimasup imaluunniit tunillatsissimasut qassiuinerat apeqqutaalluni amerleqqissapput.

Tunillatsissimasut kommunikkaarlugit

Avannaata Kommunia: 19

Kommune Qeqertalik: 20

Qeqqata Kommunia: ?

Kommuneqarfik Sermersooq: 7

Kommune Kujalleq: 0

Nunatsinni siorna marsimi tunillatsissimasoqaqqaarneraniilli aatsaat taama amerlatigisut tunillatsissimapput.

Tunillatsissimasunik nalunaarsuinerit arlaleriarluni 0-imiissimavoq - kisitsit taanna juulip aallaqqaataani aamma 0-imiippoq - tunillatsissimasulli tamatuma kingorna amerliartuinnalerput. Tuniluunneq Ilulissani, Nuummi Qaqortumilu aallartippoq - tunillatsissimasullu taakku tamarmik nunatsinnut Københavnimiit timmisartorsuarmut juulip ulluisa arfernanni marlunngornermi ilaaqatigiissimallutik.

Tamatuma kingunerisaanik killilersuinerit sukannersut tassa inuit amerlanerpaamik 20-oqqusaanerat kikkullu tamarmik tamanit ornigarneqartuni qanermut assiaquteqaqqusaanerat atuutilersinneqarput.

Malittarisassat taakku nunatsinni sumiiffinni amerlanerpaani arfininngornermat atorunnaarsinneqassapput. Taakkununngalu taarsiullugu tamakkiisumik akiuussuserneqarsimanermut uppernarsaat imaluunniit coronamik tunillatsissimannginnermut uppernarsaat sivisunerpaamik akunnernik 48-nik pisoqaassuseqartoq atorlugit neriniartarfimmut, timersortunut, imerniartarfinnut, atuakkanik atorniartarfimmut, filmertarfimmut allanullu aatsaat isertoqarsinnaalerpoq.

Pisiniarfimmut atuarfimmulluunniit iserniaraanni tunillatsissimannginnermut uppernarsaateqarnissaq tamakkiisumilluunniit kapitissimanissaq piumasaqaataanngilaq.

Aasianni, Upernavimmi Upernaviullu nunaqarfiini piffissami matumani aqunneqarsinnaanngitsumik tuniluuttoqarnera pissutigalugu malittarisassat atuutiinnarput.

Nunatta avannaani pisortat assartuissutaannut ilaanissamut malittarisassat aamma sukannerneqarput: Upernavimmit, Aasiannit Upernaviullu nunaqarfiinit aallarniartut timmisartumut allanulluunniit bussinut ilaanissamut tamakkiisumik akiuussuserneqarsimanissaat imaluunniit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsinissaat piumasaqaataavoq.

Isummersuutit

Nunatsinni coronavirusi pillugu
killiffik

Tunillatseqqasut 126  
Ullumi tunillatsittut 35  
Siullermik kapitissimasut 40.955  
Aappassaa kapitissimasut 35.924  
Tunillanneqarsimasut 504  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Septembarip 21-iat 12:00
 

Coronavirusimik tunillatsinissaq pinaveersaaruk