Nakorsap Paneeraq Noahsenip oqarnera naapertorlugu Nakorsaaneqarfik coronavirusip nunatsinni tuniluuteqqileratarsinnaaneranut piareersaannavippoq. Assi: KNR

Nakorsaaneqarfik coronaviruseqaqqilernissaanut: Piareersaannaavippugut

Nunatsinnut timmisartumik angallanneq ammaqqippat coronavirusip nunatsinni tuniluuteqqinnissaa ilimanaateqalissaqaaq.

Nunatsinnut timmisartumik angallannermik killilersuineq aamma misissuineq, misissuineq, misissuineq.

Nakorsap Paneeraq Noahsenip Nunatsinni Nakorsaaneqarfimmeersup oqarnera naapertorlugu taakku coronavirusimik nunatsinni siaruatsaaliuutaanerpaassapput.

- Taakku iluaqutaaqaat. Coronavirusi nunatsinnut timmisartumik angallannermik killilersuinikkut nunatsinni tuniluukkunnaarpoq, Paneeraq Noahsen KNR-imut oqarpoq.

Nunatsinni coronaviruseqartutut paasineqartoq kingulleq apriilip ulluisa sisamaanni nalunaarutigineqarpoq. Nunatsinnulli timmisartumik angallannermik killilersuineq suli atuuppoq - maannamullu pissutsit aallaavigalugit juunip aallaqqaataata tungaanut atuutissalluni. Taamaattumik Islandimiit Danmarkimiillu nunatsinnut timmisartumik angallanneq tamatuma kingorna ammaqqippat, coronavirusi nunatsinni tuniluutileqqeriaannaavoq.

AAMMA ATUARUK Nakorsaq: Naamik, Nuummi coronamik tunillatsinnikuusimasut misissoqqissanngilagut

Nunatsinni nakorsaanerup, Henrik L. Hansenip, Naalakkersuisullu coronavirusip ajornartorsiortitsinerani tusagassiortunik katersortitseqattaarnerminni tamanna ataasiaannarani ilisimatitsissutigisarpaa.

- Kalaallit Nunaat avammut massakkutulli matoqqaannarsinnaanngimmat nunanit assigiinngitsunit arlalinnit nunatsinnut timmisartumik ungasinngitsukkut angallattoqaqqissinnaanngussaaq, tamannalu ilutigalugu coronavirusi nunatsinnut annguteqqerataannaalissalluni, taanna P1-imut issaq taama oqarpoq.

Iliuusissiaq atuutiinnassasoq

Taamaappat peqqinnissaqarfik coronavirusip nunatsinni tuniluuteqqileratarnissaanut qanoq upalunaarsimatigiva? Paneeraq Noahsen apeqqummut tassunga ima akivoq:

- Tuniluuttoqannginnissaanut iliuusissiaq suli atuuppoq, sulimi misissuisarpugut, tunillanneqarsimasunillu paasisaqaraangatta angerlarsimaannaqqusarpavut tunillaasorlu ujartarlugu. Taamaattumik nunatsinni nakkutigeqqissaarsinnaanngisatsinnik tuniluuttoqarnissaa pakkersimaarniarlugu iliuusissiaq atuutiinnassaaq.  

Coronaviruseqartullu uninngaviannik Nuummi Dronning Ingridip Napparsimmavissuani pilersitsipput. Nunallu immikkortuini napparsimmaviit peqqissaaviillu minnerit coronaviruseqartut uninngavissaliuunneqarput.

AAMMA ATUARUK Savalimmiuni tusagassiortoq corona pillugu: Inuit paatsuungapput

Paneeraq Noahsenillu oqarnera naapertorlugu coronaviruseqartut Nuummi uninngavissaat misissuinernik allanik ikilisaanikkut amerliartuaartinneqarsinnaapput. Dronning Ingridip Napparsimmavissuani anersaartuutit katillutik 20-upput.

Aammaaqqinnissaq isumaliutigineqartoq

Nakorsaaneqarfiup peqqinnissami oqartussatut nunatsinnut nunatsinniillu timmisartumik angallannerup ammaqqinnissaanik innersuussinissaanut suut aalajangiisuussappat?

- Nunani sanilerisatsinni qanoq tuniluuttoqartiginersoq eqqummaariffigaarput. Assersuutigalugu Danmarkimi tuniluunneq siaruaassimappat nunatsinni tuniluutttoqalernissaa ilimanartorujussuuvoq, Paneeraq Noahsen oqarpoq.

AAMMA ATUARUK Savalimmiut: Coronamik tunillatsinnikuusimasut napparsimaleqqittut

Danmarkimi peqqinnissaqarfiit coronaviruseqartunik nunatsinneersunik qanoq uninngasuuteqarsinnaatiginersut isumaliutigineqartut ilagaat.  

- Piareersaaginnaavippugut, paasisanullu kingullernut saqqummiussuunneqartunut alaatsinaappugut. Tamattami aatsaat taama nalaataqarpugut, Paneeraq Noahsen oqarpoq.

Isummersuutit