Nakorsaaneq: Upernavimmi coronavirusimut misissuisoqarunnaarnera pissutissaqarluarpoq
Innuttaasut taama aalajangertoqarnerani naleqartinneqanngitsutut misigipput, taamaangali killittoqarsimanera pissutissaqarluartoq nakorsaaneq Henrik L. Hansen KNR-imut oqarpoq.
Upernavimmi coronavirusimik tunillanneqarsimasinnaasunik misissuinermi, inuit misissortittut tallimaagaangata ataaseq tunillanneqarsimasartoq paasineqarpoq.
- Tassa amerlasuut tunillanneqarsimasutut paasineqarput, illoqarfimmilu tuniluuterujussuarpoq, nakorsaaneq Henrik L. Hansen oqarpoq.
Taamaammat tunillanneqarsimasunik nutaanik ujartuinissaq peqqinnissaqarfimmit ilungersuutigineqarujussuartariaqanngitsoq nakorsaaneq oqarpoq
AAMMA ATUARUK Upernavimmi killilersuutit nutaat atuutilerput
Periuseq imaakkaluarpoq, tunillanneqarsimasunik paasisaqartoqartillugu mattusimaqqusisoqartarpoq. Upernavimmilu taama tuniluuttoqartigitillugu illoqutigiit ataasiakkaat mattusimaqqunagit Upernavimmiut tamarmik tunillanneqarsimasumut qanillisimasutut nalilerneqartariaqarnerat pisariaqalersimalluni.
- Kikkut tunillanneqarsimanerinut malinnaanissarput ajornarpoq. Tunillatsissimasummi amerlavallaarput.
Upernavimmi tunillatsissimasunik misissuisoqarnera kisiat unitsikkallarneqanngilaq. Coronavirusimummi akiuussusersuineq aamma unitsinneqarpoq.
Tunillanneqarsimasut qanillisimasullu akiuussuserneqanngikkallassasut
Nakorsaanerup nassuiaanera naapertorlugu, coronavirusimik tunillanneqarsimasut akiuussuserneqarunik timi marloriaammik napparsimalissaaq. Tassalu timip illersuutai nappaammut akiuussummullu akiuinialissammata.
- Tassa imaappoq inuk tunillanneqaruni timia nappaammut akiuunnialertussaavoq. Taassumalu qaavatigut kapitikkuni marloriaammik akiuunniartussanngussalluni.
Upernavimmilu akiuussusersuisoqaqqilerpat innuttaasut kapitinnissaat nakorsaanerup kaammattuutigaa. Aamma coronavirusimik tunillanneqarsimagaluaraanniluunniit. Peqqissinermiilli siusinnerpaamik sapaatit akunneri sisamat qaangiutereerpata kapitittoqarsinnaavoq.
Naalakkersuisut siulittaasuata, Múte Bourup Egedep innuttaasut ernumanerat paasisinnaavaa.
- Soorunami paasisinnaavara, aamma tuniluunneq taama annertutigisoq innuttaasut toqqissisimannginnerat paasilluarsinnaavara taamaammat aamma iliuusissat assigiinngitsut politikkikkut naalakkersuisut partiivisa siuttuisalu ataatsimoorlutik suliaralugu ataatsimoorfigisimavaat, nalilersortuassallugulu ulluni aggersuni. Taassuma saniatigut peqqissutsikkut nakorsaaneqarfimminngaanniillu nalilersuinerit taakkua aamma soorunami tusaaniagassaraagut, taakkunannga nalunnginneqarmat qanoq ilioraanni aamma nualluummik akiuineq qanoq pitsaasumik anigorniarneqarsinnaanersoq, Múte B. Egede oqarpoq, nangillunilu:
- Tassa, sapinngisaq tamaat atorlugu pisortat innersuussutaanik malinninnissaq, taannaavoq inuttut ataasiakkaatut iliuuseqarnitsigut nualluummik tunillanneqarnissatsinnut, imaluunniit nualluutip tuniluunniissaanut pakkersimaarinninnissamik tunngaviit annerpaartaat. Toqqissisimanissaq aammalu uivinnginnissaq aamma taannaavoq pingaarutilik. Isumaqarpunga inuiaqatigiinni ilikkalertorsimagipput ukiuni kingullerni coronap atuunnerani. Qanoq iliornikkut inuiaqatigiittut corona pakkersimaarsinnaanerlugu