Nakorsaaneq: Qoorsiuisarnissamik Siumup siunnersuutaa piviusunngorsinnaanngilaq
Taama isumaqarpoq Nuummi Nakorsiartarfimmi nakorsaaneq, Jesper Olesen.
- Tamatuma isumaginissaa ajornakusoortorujussuussaaq. Tamanna inunnit uppernarsarneqarsinnaassappat misissugassatut tigusat 100 procentimik akornuteqassanngillat, Jesper Olsen Atuagagdliutinut oqarpoq, erseqqissaatigalugulu misissuinissarpassuit pisariusorujussuussasut.
Aamma politikerit arlaat nakorsaatitortuuppat, imaluunniit misilitsinnginnermini imermik annertuumik imersimappat kukkusoqarsinnaavoq.
Politikerit tamarmik aanngajaarniutinik, soorlu kokainimik, heroinimik hashimilluunniit, atuisuunersut misissorneqassappata, sapaatip akunneranut arlaleriarlugit misissortariaqassapput.
Nakorsaanerup Jesper Olesenip Siumup siunnersuutaa cykilertarnermi nukittorsaatinik atuisoqartarneranik misissuisarnernut assersuuppaa.
- Politikeri ikiaroornartumik atuisuusoq paasineqarpat uppernarsaatissarsiornissaq ajornartorsiutaasinnaavoq. Tamanna aarlerinartoqarpallaaqaaq, Jesper Olesen Atuagagdliutinut oqarpoq.
Peter Kurrild-Klitgaardip, Københavnimi Universitetimi professorip, aviisimut aamma erseqqissaatigaa, siunnersuut akuerineqassappat, Kalaallit Nunaat tassaalissasoq nunarsuarmi nunani demoratiimik ingerlatsiviusuni siullersaalluni qinikkanut piumasaqaateqalissasoq ilumut ikiaroornartumik atuinnginnermik uppernarsaammik takutitsinissamut.
