Nakorsaaneq: Qasigiannguani tuniluunneq unitsissinnaavarput Upernavimmiunngitsorli

Nunatsinni tunillatsissimasut amerlassusaat pillugit ataasinngornermiilli kiisami saqqummiunneqaqqipput.

Tunillatsissimasut nutaat 87-it kommuninit sisamaneersut kisitsisit nutaat takutippaat.

Sumiiffimmili ataatsimi amerlanerpaapput: Qasigiannguani tunillatsissimasut nutaat 53-it paasineqarput, taakkulu ilarpassuit meeqqat atuarfianni atuartuupput.

- Unammillernartuni tamanna nutaartaavoq, nakorsaaneq oqarpoq, nangillunilu:

- Tunillatsissimasut taama amerlatiginissaat naatsorsuutiginngikkaluarparput. Suleqatigiinnik misissuiartortussanik avunnartitsinissaq ullumi sulissutigilerparput.

- Qasigiannguanili tuniluunneq Upernavimmut sanilliullugu suli unitsissinnaassallugu nalilerparput.

Tuniluunneq nakorsaanerup tupaallaatigigaa

Tunillatsissimasorpassuit nutaat nakorsaanerup tupaallaatigaa. Sapaatip akunnerata siuliani Upernavimmi tunillatsissimasut amerlipiloornerat aamma tupaallaatigaa.

- Upernavimmi tuniluunnerup siaruangaatsiareersimanerani paasivarput. Upernavimmi maanna unikaallaqqapput, napparsimaruluttoqarneranilli nalunaaruteqartoqanngilaq. Qanimut malinnaaffigaarput, Henrik L. Hansen oqarpoq.

AAMMA ATUARUK Qasigiannguani atuarfiup pisortaa: Taama nalaataqarnikuunngilagut

Upernavimmi tunillatsissimasuni meeqqat aamma amerlanerpaapput.

- Upernavimmi tunillatsissimasut amerlangaarmata innuttaasut ikinnerpaamik affaat tunillatsereersimanissaat ilimagaarput, nakorsaaneq oqarpoq.

Taamaammat tuniluunnerup pakkersimaarniarnissaanut misissuingaatsiartoqarnissaa isumassaqanngitsoq oqartussat nalilerpaat. Tassungali taarsiullugu ikiorneqarnissaminnik pisariaqartitsisut ukkatarineqarput.

Qamittoorneq pissutigalugu ulapputtoqartoq

Nuummi Nakorsaaneqarfiup qullersaqarfigisaata qamittooqqangaatsiartoqarnera unammillernartorsiorfigaa.

Tamanna innuttaasunut tamanut sunniuteqarpoq, nakorsaaneq aamma minitaanngilaq.

- Piffissami sivisuumi internettimut attaveqannginnerput imaluunniit allanut atortussatsinnut attaveqannginnerput unammillernalaarpoq. Pingaartumik oqarasuaatit attaveerunnerat unammillernarpoq, nakorsaaneq oqarpoq.

- Piffissap ilaani allaffipput Dronning Ingridiup Napparsimmavissuanut nuupparput. Tassani ajornartoornermi ajunngilluinnartumik sarfalersuuteqarlunilu oqarasuaatit internettilu attaveqarput.

AAMMA ATUARUK Corona pillugu ullumikkut kisitsisit: Ataasinngornermiit tunillatsissimasut nutaat 87-it paasineqartut

Sarfaaruttoorneq peqqinnissamik oqartussat misissuinernik tunillatsissimasinnaasunillu ujartuinermik suliaqarnissaanut unammillernarpoq. Suliaqarneq piffissami sivisuumi ilaatigut uninngasarpoq.

Henrik L. Hansenilu allanik suliassaqarnera pissutigalugu corona pillugu kisitsisit nittartakkakkut ingerlaavartumik pisarnertut nutarterneqanngillat.