Nunatsinni misissorneqartut 52-it akissutersineqarput, taakkulu tamarmik tunillatsissimanngillat.Assi: KNR

Nakorsaaneq: Nuummi tunillatsissimasut tamarmik peqqisseqqipput

Piffissami alianartumi nutaarsiassatsialaqarpoq: Coronavirusimik tunillatsissimasut aqqanillit tamarmik peqqisseqqipput.

Timmisartut apriilip ulluisa 30-anut uningatinneqarput. Nuummi atuarfiit ulluuneranilu paaqqinniffiit matoqqapput, neriniartarfiit, imerniartarfiit pisiniarfiillu qassiiusut aamma matoqqatinneqarput.

Coronap ajornartorsiortitsinera inuussutissarsiornermik ingerlataqartunut inuunermullu sakkortuvoq. Illoqarfiit pingaarnersaanni imigassaq suli inerteqqutaavoq, inuillu qulinit amerlanerusut ataatsimoornissaat inerteqqutaalluni.

Qaamaninnguaqarporli: Coronavirusimimmi tunillatsissimasunit aqqanillit Nuummiittut tamarmik peqqisseqqipput.

Nakorsaaneq, Henrik Hansen tusagassiortunik ullumi katersortitsinermi oqarpoq.

Nunatsinni misissorneqartut 52-it akissutersineqarput, taakkulu tamarmik tunillatsissimanngillat.

Nunatsinni coronavirusimut misissorneqartut katillugit 770-iupput.

AAMMA ATUARUK Tamaat isigalugu: Coronavirus pillugu killiffik

Soorli illoqarfiit pingaarnersaanni tunillatsissimasoq ataasiinnaappat illoqarfik matoqqatinneqarpa?

- Tunillatsinnermit ullut 14-it ingerlaneranni aatsaat ersiuteqalertoqarsinnaavoq, nakorsaaneq oqarpoq.

- Aamma nunatsinnut tikittoqarnikuuvoq – assersuutigalugu ilinniartut nunanit allanit – timmisartuussinerup marsip 20-ani inerteqqutigineqalerneranit tikissimasut, Henrik Hansen oqarpoq.

- Mianersorluarutta Naalakkersuisullu mianersornissaannik innersuussigutta tamanna nunarsuarmi ilungersunartoqarneranik tamanna pissuteqarpoq. Peqqinnissaqarfimmi paarlattaasussatsinnik taamaatiinnartoqarpugut tamannalu pissutigalugu piffissamik atorluaanissarput pingaaruteqarluinnarpoq, sunalu tamarmi matoqqatillugu tamanna aningaasartuutaangaatsiartoq missingersortuarparput – covid-19-illi siammaaterujussuarnissaa kissaatiginngilarput, nakorsaaneq oqarpoq.

Misissuinermut atortorissaarutit nutaat aqagu tikissasut

Nakorsaanerup oqarnera naapertorlugu misissuinissamut atortorissaarutit Nuummut aqagu tikissapput. Misissugassammi tamarmik Københavnimut Statens Serum Institutimut nassiunneqartariaqartarput - tamanna piffissamik atuiffiusarluni.

- Misissugassat tigusagut Københavnimut nassiunneqaqqaartussaasarmata kinguaattooqqapput. Taamaammat siumut iliuuseqarpugut.

Namminersorlutik Oqartussat savalimmiormiut suliffeqarfiutaannut, Amplexa Geneticsimut isumaqatigiissuteqarput. Suliffeqarfiup maskiinat marluk nassiuppai, taakkulu Dronning Ingriup Napparsimmavissuanut aqagu tikiunneqassapput. Atortorissaarutip aappaa misissuinermut atorneqassaaq aappaalu sillimmataassalluni.

AAMMA ATUARUK ASSILIARTAT: Coronavirusi timimi ima iliortarpoq

Suliffeqarfiup teknikkeqarnermut pisortaa Nuummukaqataassaaq, Nuummimi peqqinnissaqarfimmi sulisut atortorissaarummik ilinniartinneqassapput.

- Nunatsinni misissuinernik qaqugorpiaq aallartitsisinnaanerluta oqaatigisinnaanngilara. Misissuivimmimmi aallartitsineq imaaliallaannarneqarsinnaanngilaq. Poorskikkulli nalaanni aallartissinnaanissaa sulissutigaarput, Henrik Hansen oqarpoq.

Misissuiffik atulerpat misissugassaq ullup affaannaa atorlugu paasineqarsinnaalissaaq - nunattali sinneranit misissugassat Nuummut suli assartorneqaqqaartariaqartassapput.

Isummersuutit