Nakorsaaneq: Nakorsaq oqaloqatigissaqqaarpat, utaqqeqqaassaatilli

Dronning Ingridip Napparsimavissuanut nakorsiartarfimmut sianeruit pinngitsoornak nakorsamik oqaloqateqarnissat qulakkeerneqarpoq.
Allattoq Dorthea Johansen
juunip 06-at 2014 11:59

Siullermik arlallit nakorsap oqarasuaataanut sianeraangamik optageqqasoortarsimapput. Optageqqaneq pilertarpoq utaqqisut 70-it angusimagaangamigit. Nakorsalli oqarasuaataanut sianerneq killeqarunnaarpoq. tamatuma qulakkeerpaa nakorsamik oqaloqateqarnissat.
 
Nakorsap oqarasuaataanut sianeruit utaqqisuni normu 1-nngornissat minutserpaalunnik suli utaqqinerusalissavat. Taamakkaluartorli pinngitsoornak nakorsamik oqaloqateqarnissat qulakkeeqqasoq, Dronning Ingridip Napparsimavissuani nakorsaanerup Jesper Olesenip oqaatigaa.
 
Nakorsap oqarasuaataanut sianeraanni utaqqisut 70-it tikissimagaanni nakorsamik oqaloqateqarnissaq periarfissaasarsimanngilaq. Tamannali ajornartorsiut aaqqittoq, nakorsaanerup oqaatigaa.
 
- Nakorsap oqarasuaataanut sianerneq akeqarunnaarmat maluginianngitsoorsimavarput utaqqisut killeqartut. Killeqarneratalu patsisigisaanik nakorsap oqarasuaataanut sianertut ilaat nakorsamik oqaloqateqarnissaminnut periarfissaqanngitsoortarsimapput. Massakkulli nakorsap oqarasuaataanut sianerneq allannguuteqarpoq, Dronning Ingridip Napparsimavissuani nakorsaaneq Jesper Olesen oqarpoq.
 
Nakorsap oqarasuaataanut sianernerup allannguuteqarnera unaavoq, sianertut qanoq amerlatigigaluarpataluunniit nakorsamik oqaloqateqarsinnaalertut. Nakorsap oqarasuaataanut sianerneq akeqarunnaarmat utaqqisut 70-nut killeqarsimavoq. Massakkulli utaqqisut amerlassusaat killeqarunnaarpoq.
 
- Massakkut nakorsap oqarasuaataanut sianeruit qulakkiissavat nakorsamik oqaloqateqarnissat. Soorunalimi utaqqisut tulleriiaassapput, aamma soorunalimi utaqqeqqaassaatit. Taamaakkaluartoq pinngitsoornani nakorsamik oqaloqateqarsinnaalissaaq Jesper Olesen oqarpoq.
 
Naak nakorsap oqarasuaataanut sianerluni utaqqineq sivisisusaraluartoq, utaqqisut killeqarunnaarnerata kinguneranik utaqqineq suli sivitsortussanngortoq, Jesper Olesenip oqaatigaa. Taamakkaluartorli nakorsamik pinngitsoorani oqaloqateqarnissaq qulakkeerneqartoq aamma oqaatigaa.
 
- Iluarisimaaqaara kikkulluunniit nakorsamik oqaloqateqarusuttut periarfissikkatsigit. Neriorsuutigisinnaavaralu inuk kinaluunniit nakorsap oqarasuaataanut sianertoq nakorsamik oqaloqassasoq. Taamatut sullissineq pitsaasuusoq oqaatigisinnaavara. Tamarmimmi nakorsamik oqaloqateqarnissaat qulakkeerparput, Dronning Ingridip Napparsimavissuani nakorsaaneq Jesper Olesen oqarpoq.