Nakorsaaneq Ilulissani akiuussutissamik kapisineq pillugu: Taperserneqarluarpoq
Nuummi akiuussutissamik kapuuinerit ataasinngornermi aallartereersullu Ilulissani marlunngorneri kulturip illorsuani kapooripput.
Ilulissani akiuussutissamik kapitinnissamut kikkut siulliullutik neqeroorfigineqarnersut, Peqqinnissaqarfik Avannaani nakorsat pisortaat Peter Vedsted aperineqarami ima akivoq.
- Kalaallit Nunaanni pilersaarutaasoq malipparput, utoqqaanerpaat siulliunneqarput taava 75-ileereersimasut, taava anigorsinnaanngisaminnik nappaatillit peqqissutsimikkut sanngiitsumik inissisimasut, tamatuma kingorna peqqinnissaqarfimmi utoqqaallu illuini sulisut, Peqqinnissaqarfik Avannaani nakorsat pisortaat Peter Vedsted oqarpoq
Ilulissani akiuussutissamik ullumi kapitittut ilagaat David Kristoffersen aamma Dine Kristoffersen.
Akiuussutissamik kapitilluni qanoq ippa?
Ajunngilaq, iluaqutigissavara.
Akiuussutissamik kapitilluni qanoq ippa?
- Tassa ajorunnannginnami qujanassooq.
Akiuussutissalersorneqarnissamut neqeroorfigineqartut 90 aamma 95 procentit sinnerlugit akuersaarsimagaat avannaani nakorsat pisortaat nassuiaavoq.
Ilulissani innutaasut 160-it marlunngornermi covid 19-mut akiuussutissamik kapineqarput, tamanaanalu nakorsat pisortaata nuannaarutigiserujussuuuaa.
- Isumaqarpunga ajunngilluinnartoq, tulluusimaarutigeqaara nuannaarutigeqalugulu innuttaasunut neqeroorut pitsassuaq neqeroorutigisinnaaleratsigu Peter Vedsted oqarpoq.
Innuttaasut akiuussutissamik kapitittussat peqqinnissaqarfimmit ukiui nappaataallu ilisimaneqartut aallaavigalugit toqqarneqartarput attavigineqartarlutillu.
Ilulissani utoqqaat illuanni najugaqartut 50-it ullumikkut kapineqassapput aqagulu innuttaasut 182-it kapineqassallutik.
Akiuussutissamik kapisinerit Nuummi Ilulissanilu siulliunneqarnerannut pissutaavoq, passunneqarnissaa uninngatinneqarnissaa assartorneqarnissaalu pisariusorujussuummat.
Akiuussutissat kingusinnerusukkut nassiunneqartussat assartuussineq uninngatitsinerlu eqqarsaartigalugit, piuminarnerunissaat sulissutigineqarpoq, taamaalillui nunatsinni sumiffinni arlalinni ataatsikkut kapuinissaq ajornannginnerulissammat.