Nakorsaaneq corona pillugu: Nunarput immikkuullarissumik inissippoq

Nunatsinni coronavirsumik suli tunillatsittoqaqqinngilaq.

Ullut 13-issaat coronavirusimik tunillatsittoqaqqinngilaq.

Misissuinerit kingulliit Nuummi misissuisarfittaami tassa Dronning Ingridip napparsimmavissuani misissorneqartarput. Maannamullu maani misissukkat 1043-upput.

Nuummi inuit aqqanillit tunillanneqarnikuupput, taakkulu tamarmik peqqissinikuupput, taakkulu tamarmik napparsimmavimi uninnganikuunngillat.

Nunarsuarmi kisiartaalluta coronavirusimik eqqugaasimasortaqarunanngitsugut naalakkersuisut siulittaasuat, Kim Kielsen (S) tusagassiortunik katersortitsinermini oqaatigaa.

Nunattali nakorsaanera tassunga tunngatillugu ingalassimaarneruvoq.

- Nunarput tamakkerlugu tunillatsissimasoqanngitsutut oqaatiginissaa siusippallaarpoq. Taamaammat maleruaqqusat innersuunneqartut malinneqarnissaat kaammattuutigissavara, taamaaliornikkut tuniluuttoqaleraluarpat iliuuseqarnissatsinnut piareersimaneruniassaagut.

- Kisianni nunarput immikkuullarissumik inissippoq. Nunarsuup sinnerani tuniluutipiloortoqarnerani, nunatsinni eqqissisimavugut.

Misissuinerit Nuummiinnaq misissorneqatalersut

Coronavirusimik tunillatsisimanermik misissugassat Dronning Ingridip napparsimmavissuata misissuiviani maanna misissorneqartalerput. Siusinnerusukkut misiligutit Danmarkimut københavnimut Statens Serum Institutsimut nassiunneqartaraluarput, taamaalillunilu akissutissarsinissamut ullualuit utaqqisariaqartarlutik.

Nuummi misissuivik atuleqqaarnerani misissugassanik marlunnik tigusisoqartarpoq – misissukkat Nuummi Købanhavnimilu misissorneqartarlutik. Maannali tamanna unippoq.

- Maanna misissuisinnaanngorpugut. Ullaap tungaani misiligummik tigusigutta, ualip ingerlanerani akissutissarsisinnaaleriissaaq. Tamanna sulinitta siulianit pitsaanerungaatsiarpoq, taanna oqarpoq.

Nunarput ammariartuaarneqassaaq

Nunarput tamakkerlugu inatsisinut killilersuinernullu tunngatillugu sapaatip akunnerata tulliani naalakkersuisoqarfik saqqummiiummaarpoq.

Nunatta iluani avataanilu angallanneq apriilip naanissaata tungaanut matoqqatinneqarpoq.

Ilinniarfiit atuarfiillu ilaat ammaqqinnikuupput – Nuummi sinerissamilu.

Nuummi pisiniarfissuaq Nuuk Center matoqqatinneqaraluartoq maanna ammaqqippoq, imigassanik aalakoornartortalinnik matoqqatitsineq sivitsorneqanngilaq.

Nujaleriffiit, timigissartarfiit, timersortarfiit, pillorissaasut assigisaallu apriilip naanissaata tungaanut matoqqatinneqarput.