Aqukkuminarnerullunilu atoruminarneruvoq, tamannalu pillugu Kalaallit Nunaat tamakkerlugu atorneqarsinnaalluni, Modernap akuersissutigineqaqqammersoq pillugu, Henrik L. Hansen taama oqarpoq.Assi: KNR / Malik Brøns

Nakorsaaneq akiuussutissap akuersissutigineqarnerani: - Kalaallit Nunaannut nutaarsiassatsialaavoq

Suliffeqarfiup Modernap coronamut akiuussutissiaa akuersissutigineqarpoq. Tamanna nunatsinnut nutaarsiassatsialaasoq, nunatta nakorsaanera, Henrik L. Hansen oqarpoq.

- Kalaallit Nunaannut nutaarsiassatsialaavoq. Aqukkuminarnerullunilu atoruminarneruvoq, tamannalu pillugu Kalaallit Nunaat tamakkerlugu atorneqarsinnaalluni. Maanna akiuussutissamut atorneqartumut naleqqiullugu piumasaqaatitaqannginneruvoq, nakorsaaneq Henrik L. Hansen nassuiaavoq, Pfizer/BioNTechip akiussutissaliaata nillerluinnartumi toqqortaatigineqarnissaatut sukannertigisumik piumasaqaatitaqannginnerunerarlugu.

Aassereeraangami taassuma saniatigut ingerlaannaq atorneqarsinnaavoq.

- Kalaallit Nunaata sineriaa tamakkerlugu anguneqarsinnaassaaq. Kisianni tassa nunatsinnut assartorneqaqqaartariaqassaaq. Modernammi akiuussutissaliaa naalagaaffeqatigiinnut nassiunneqartoq aallaqqaammut annertunavianngilaq.

Modernami akiuussutissanik amerlasuunik nassiussisinnaanngikkallarpoq.

Modernap akiuussutissaliaata Kalaallit Nunaannut qanittukkut assartorneqarnissaa taamaammat naatsorsuutigineqassanngilaq:

- Tamanna pillugu Kalaallit Nunaanni innuttaasut amerlasuut qaqugu akiuussuserneqarsinnaanersut oqaatigisinnaanngikkallarparput, Henrik L. Hansen oqarpoq.

Akiuussutissat 5.000-it Danmarkimukaanneqartut

Naalagaaffiup Nappaatinut Akiuussutissaliorfiata, Statens Serum Institutip oqarnera naapertorlugu akiuussutissat 5000-t Modernamit Danmarkimut sapaatip-akunnerata tulliani nassiunneqarumaarput.

Taakkunannga qassit nunatsinnut ingerlateqqinneqarumaarnersut oqaatigissallugu siusippallaarpoq.

- Tamanna pillugu paasissutissat sukumiinerusut piginngilagut. Danmarkimi oqartussat marlunngormat ataatsimeeqatigaagut, akiuussutissallu qaqugu, qanorlu amerlatigisut pissarsiariumaarnerivut paasissutissiissutigineqanngilaq, qanittukkulli nassiussisoqarnissaa naatsorsuutigineqarsinnaanngilaq, akiuussutissarlu maanna pissarsiareriigarput atuinnarallassavarput, nunatta nakorsaanera Henrik L. Hansen oqarpoq.

Europami nakorsaatinut aqutsisoqarfiata, EMA-p, Modernap akiuussutissaliaata akuersissutigineqarnissaa innersuussutigereeraalu EU-Kommissionip akiuussutissaq akuersissutigaa.

Akiuussutissaq Modernameersoq EU-mi akuersissutigineqartut aappassaraat. Akiuussutissaq siulleq akuersissutigineqartoq Pfizerimiit BioNTechimiillu, juullinngitsiarnerani akuersissutigineqarpoq.

Nunatsinni akiuussutissalersuineq, ataasinngornermi januaarip sisamaani aallartinneqarpoq. 

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 16.504
  Tunillanneqarsimasut
30
  Peqqisseqqittutut nalunaarutigineqartut 29
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: Nunatsinni Nakorsaaneqarfik
  Nutarterneqarnera:
  januaarip 15-at 2021 nal. 10:30