Nunatsinni pinerluuteqarsimasunut inissiisarfinni nakkutilliisut akissarsiaasa qaffanneqarnissaat, Pilerluttunik Isumaginnittoqarfiup Danmarkimilu parnaarussalerisut kattuffiata qaammatit pingasut matuma siorna isumaqatigiissutigaat. Nakkutilliisulli akissarsiaasa qaffaataat maannamut suli tunniunneqaratik.Assi: KNR

Nakkutilliisut akissarsiamik qaffaatissaat suli utaqqigaat

Nakkutilliisut akissarsiamik qaffaatissaat apriilimili utaqqivaat. Akissarsiaannulli isumaqatigiissut oqartussani unittoorutaavoq. Danskit sulisoqarnermut piginnaasaqarnermullu aqutsisoqarfiat tusarluaatissaqaqqajaasoq ilisimatitsivoq.

Nunatsinni pineqaatissinneqarsimasunut inissiisarfinni nakkutilliisut akissarsiaat malunnartumik qaffanneqassasut, Christiansborgimi politikerit apriilimi isumaqatigiissutigaat - tamatumunnga 38,4 millionit koruunit ukiuni sisamani agguataarneqassallutik.

Aningaasat taakkua agguataarnissaat, Danmarkimi parnaarussalerisut kattuffiata aamma Pinerluttunik Isumaginnittoqarfiup qaammatit pingasut kingorna isumaqatigiissutigaat. Tamatumali kingorna unittoorutigineqarput.

AAMMA ATUARUK Fængselsforbund: Tiltrængt aftale for anstaltsbetjente

Isumaqatigiissutimmi danskit akileraartarnermut ministereqarfiata sulisoqarnermut piginnaasaqarnermullu aqutsisoqarfianit, tassa Medarbejder- og Kompetencestyrelsenimit, akuerineqarnissaa amigaataaginnarpoq.

Danmarkimi nunatsinnilu 2020-mi januaarip aallaqqaataata tungaanut akissarsianik naleqqersuussineq:

  • Nunatsinni pineqaatissinneqarsimasunut inissiisarfimmi ukiut marluk tungaannut nakkutilliisoq tapisiat aalajangersimasut ilanngullugit 19.365 koruuninik qaammammusisarpoq.
  • Danmarkimi parnaarussivimmi ukiut marluk tungaannut nakkutilliisoq tapisiat aalajangersimasut ilanngullugit 24.769 koruuninik qaammammusisarpoq.
  • Nikingassut 5.400 koruuniuvoq.
  • Nunatsinni nakkutilliisut sapaatit-akunnerannut 40 tiimit sulisarput, Danmarkimilu nakkutilliisut sapaatit-akunnerannut 37 tiimit sulisarlutik.
  • Isumaqatigiissut nutaaq 2020-imi januaarip aallaqqaataani atuutilerpoq. Tassa imaappoq, nunatsinni nakkutilliisut Danmarkimi illoqarfiit pingaarnersaanni parnaarussivinni nakkutilliisutulli akissarsiaqassapput.

Tusarfik: Pinerluttunik Isumaginnittoqarfik

Tamannalu danskit parnaarussiviini nakkutilliisut kattuaffianni allatsip, René Larsenip, nunatsinni pineqaatissinneqarsimasunut inissiisarfinni nakkutilliisut sinniisuata, pakatsissutigaa. 

- Danskit inatsiseqarnermut ministereqarfiat, naalakkersuisoqarfimmi pisortaq aqutsisoqarfiillu assigiinngitsualuit atassuteqarfigisarpavut. Isumaqatigiissullu taanna illuatungeriinnit tamanit pingaaruteqartutut isigineqartoq, salliunneqartoq akuerineqangajaliivittorlu akissutiminni tamatigut erseqqissaatigisarpaat, René Larsen oqarpoq nangillunilu:

Ministereqarfik aqutsisoqarfillu akuersiniarpiloor-tarsimasorinarput.

Nunatsinni pineqaatissinneqarsimasunut inissiisarfinni nakkutilliisunut isumaqatigiissut 2020-mi januaarip aallaqqaataani kingumut atuutilerpoq.

Akissarsiaalli qaffaataat suli tunniunneqanngimmata isumaqatigiissut iluaqutaavallaanngitsoq, René Larsen oqarpoq.

- Akissarsiaasami qaffanneqarnissaannut isumaqatigiissutip akuerineqarnissaanut taama sivisutigisumik utaqqisariaqarnerat ajorpoq. Aningaasammi suli tigunngisat pisissutigineqarsinaanngillat. Tigutinnagillu ineqarnermut akiligassanullu allanut aamma akiliutigineqarsinnaanngillat.

Danskit parnaarussiviini nakkutilliisut nunatsinni suleqatiminnit 4.500 koruunit 7.000 koruunillu akornannik maannamut qaammammusiaqarnerusarput. Akissarsiaasalu assigiinngissutaat, danskit parnaarussiviini nakkutilliisut kattuaffiata ukiuni arlaqartuni suaartaatigaa. 

Aqutsisoqarfik: Isumaqatigiissut sapaatit akunnerata tulliani nassiunneqassaaq

Akissarsiaasali qaffaataat tunniunniunneqangajalerunarput.

Danskit sulisoqarnermut piginnaasaqarnermullu aqutsisoqarfiat isumaqatigiissutinik, akissarsianik soraarnerussutisiassanillu naalagaaffimmi atorfillinnut tunngasunik suliaqarfiusoq, KNR-imut mailikkut ima ilisimatitsivoq:

- Pinerluttunik Isumaginnittoqarfik danskillu parnaarussiviini nakkutilliisut kattuffiat isumaqatigiissuteqartuupput, taakkununngalu sapinngisamik piaarnerpaamik - immaqa sapaatit akunnerata tulliata ingerlanerani - akissuteqassangavugut.

AAMMA ATUARUK Politiit akissarsiaanut qaffaaneq: Ukiunut sisamanut 10,8 millionit koruunit

Isumaqatigiissut sulisoqarnermut piginnaasaqarnermullu aqutsisoqarfimmit akuerineqareerpat, Pinerluttunik Isumaginnittoqarfiup danskillu parnaarussiviini nakkutilliisut kattuffiata akuereqqittussaavaat. Tamanna imaaliallaannarneqarsinnaasoq, René Larsen oqarpoq, taamaallillunilu nunatsinni nakkutilliisut akissarsiaannut qaffaatit tunniunneqarsinnaallutik.

Taamaammat nunatsinni nakkutilliisut ukiup 2020-p naaneranut isumalluarsinnaanngussapput.

Tamannalu pingaaruteqarluinnartoq, allatsi allappoq. Nunatsinnimi pineqaatissinneqarsimasunut inissiisarfiit ukiorpaalunngortuni nakkutilliisussaaleqipput.

- Inuussutigineqarsinnaasunik akissarsiaqartitsineq aaqqiissutaasinnaasut ilagaat. Taamaammat isumaqatigiissutip akuerineqarnissaa pingaaruteqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat