Nakkutilliisup inaani hashimik pujortartoqartarsimavoq

Inissiisarfimmi nakkutilliisup inaani hashimik pujortartoqarsimaneranik Aasianni politiit uppernarsaatinik pissarsisimapput. Nakkutilliisoq kingorna nammineq soraarniuteqarpoq. Sermitsiap nittartagaani tamanna atuarneqarsinnaavoq.
Allattoq Mads Lynge
juulip 23-at 2008 10:31

Politiit inimi misissuinerminnut atatillugu hashimik annertunngitsumik pujortarnermullu atortunik nassaarput.

Inummik allamik illoqarfimmi hasheerniarnermut akuusutut pasineqartup tigusarinninnermut atatillugu misissuisoqarpoq.

- Tigusarineqartoq hashimik aningaasanillu tigummiaqarpoq. Aamma matuersaammik inissiisarfimmi nakkutilliisup inaanut atasumik nassaarput. Misissuinermilu tassani uppernarsaatit nassaaraagut, politeeqarfimmi pisortaq Gerth Jakobsen Aasianni politiineersoq oqarpoq.

Inissiisarfimmi maanna atorfeqarnikoq maanna aanngajaarniutit pillugit inatsisinik unioqqutitsisimasutut unnertuutigineqarpoq. Pineqaatissinneqassagunilu 2.000 koruuninik pillaammik akiliisinneqarsinnaavoq, politeeqarfimmi pisortaq naliliivoq.

Aasianni inissiisarfimmi pisortaagallartoq Jan Christensen ilisimatitsivoq, unnerluutigineqartoq nammineq suliffimminit soraarniuteqartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq