Nakkutilliinerulerneq uuliasiornermi aseruisoqarnissaanut ernummassutit peersissavai
Qillerinerit kinguarsarniarlugit uuliasiornermut atortut Greenpeacemiit aserorneqarnissaat ernummatigalugu uuliamik maqisoortoqassagaluarpat isumannaallisaanermut pilersaarutit tamakkerlugit Naalakkersuisuniit aatsitassanullu pisortaqarfimmiit saqqummiukkumannginneranut tunuliaqutigitinneqarput:
- Isumannaallisaanermut pilersaarutip saqqummiunneqarnissaa kissaatigineqanngilaq, aseruisoqarnissaa ernummatigineqarmat. Isumaqarpungalu oqallisigeqqittariaqaraluaraat, ernumanerlu avaqqullugu ammaassisoqarnerusariaqartoq, Inatsisartuni ilaasortaq, Naaja Nathanielsen IA-meersoq oqarpoq.
Namminersorlutik Oqartussat pisariaqartumik saqqummiussiumannginnerannik tunngavilersuutaat, naammaginanngitsumik pilersaaruteqannginnerarlugit Greenpeacep oqaatigisareerpaa. Naaja Nathanielsenip, aatsitassanut ataatsimiititaliami siulittaasuusup, oqartussat assingusumik uparuarnianngilai:
- Greenpeacekkut Namminersorlutillu Oqartussat qanoq isumaqarnersut oqaloqatigiittarnerallu isumaliutersuutiginianngilara. Ernumassutaasut salliunnagit uanga sammerusuppakka isertuanngissutsip atulersinneqarnissaa qanoq aqqutissiussaneripput, Naaja Nathanielsen oqarpoq.
Naaja Nathanielsenip qaammat qaangiummat uuliasiorneq pillugu apeqquteqaatini siulliit quppernerit 20-it sinnerlugit amerlassusilinnik akissutisereerluni maanna parteeqatini akisussaasoq, Aatsitassanut Naalakkersuisoq, qillerinerit pillugit isornartorsiuilluni apeqquteqaqqippoq.
Isertuanngissuseq annerpaaq, paasisimasaqarneq oqallinnerlu inatsisartuni ilaasortap siunertarai, nammineq misissuinerminiit kattuffiillu soqutigisaqaqatigiit assigiinngitsut isornartorsiuereernerisa kingorna apeqquteqaateqarnermini.
Naaja Nathanielsenip apeqquteqaatimi tunuliaqutaattut ilanngullugu tikkuarpaa, inatsisini periaatsinilu sanngiiffiit suulluunniit matussuserneqarnissaat pingaaruteqartoq:
- Naalakkersuisut maannamut ilimasaarutigereerpaat misissuiniarlutik inatsisiliorniarlutillu. Eqqarsaatigaaralu siumut isigaluta minitaqarata ingerlatsissasugut, Naaja Nathanielsen oqarpoq.
Naaja Nathanielsenip oqaatigaa, misissuilluni qillerinermut tunngasut inuiaqatigiinnut annertuumik suli matoqqaqisut. Aasaq mannalu qillerisoqarnerani imaanut annertuumik eqqarneqartut eqqarsaatigalugit, isumaqarpoq eqqagassanut akoorutissanullu atuinermi inatsit erseqqissarneqartariaqartut:
- Uannut pingaarnerpaavoq isornartorsiuisartut malersugassaat ikinnerpaassasut. Takutittariaqaratsigumi inatsi periaaserlu akisussaassuseqarnitsinnut tarrarsuisuusoq isumaga malillugu nunatsinni tamatta pigisarput malillugu. Taamaasiornikkut qularnissamut tunngavissaqartoqarunnaarniassammat. Isumaqarpungalu inatsisiliornitsinni anguniagariuaannassagipput, Naaja Nathanielsen taama oqarpoq.
