Nakkutilliineq tigorusuppaa
- Piniakkat killilersukkat namminneerluta oqartussaaffigilernissaat eqqartornikuuarput, taannalu siunniutissa-gipput qularinngivippara, Jess Svane, Avannaata kommunissaani siulittaasoq, Qasigiannguaneersoq radioaviisimut ullumi oqarpoq.
Nangillunilu: - Soorunami aamma nakkutilliineq ullumikkut qitiusumit aqunneqartoq, imatut qulakkiivillugu torersumik aaqqinneqarpat, aamma soorunami aningaasartassai malinnaatinneqarpata, uagut peqataaffigerusupparput.
Radioaviisimi ippassaq oqaatigineqarpoq, nakkutilliineq ukiumut 8 million koruuninik aningaasaliiffigineqartartoq. Sukumiinerusumilli ingerlanneqassappat 1 million koruuninik aningaasaleqqittoqartariaqartoq.
Avannaata kommunissaa akileeqataajumassanerluni?
- Tassami, Namminersornerullutik Oqartussat imaluunniit naalakkersuisut, piniagassanik killilersuinermi piniarfinnillu oqartussaanerpaajupput, taamaattumik aningaasartassanik malinnaatitsinissaq eqqarsaatigilaartariaqarpaat, Jess Svane oqarpoq.
Januaarip aallaqqaataani 2009-mit nakkutilliineq Avannaata kommunissaata akisussaaffigilerusuppaa:
- Soorunami pilerigivarput, piniagassat killilersukkat uagut kommuneqarfitsinnut tunngasut annerusumik oqartussaaffigilernissaat kissaatigaarput. Namminersornerullutik Oqartussat taama sakkortutigisumik piumasaqaateqartarunik, aningaasartaannik malinnaatitsisariaqarput, Jess Svane, Radioaviisimut oqarpoq.