Nakkutilliineq sukannerneruleqqissaaq
Kinami tusagasseeriaatsip nakkutigineqarnera sukannerneroqqilissaaq.
Kina-mi ajunaarnersuaqartillugu sullivinniluunniit ajunaarneqartillugu aviisit tusagassiiviillu allat innuttaasunut tusarliussinnginnerini naalakkersuisunit akuerineqaqqaartalissapput. Tamannalu unioqqutinneqarpat tusagassiorfiit koruuninngorlugu 75.000 koruunit nalinginik akiliisinneqartalissapput.
Kinami saqitsaassutaasinnaasumik inatsimmik pilersitsisoqartussanngorpoq. Tassami, Kinami ajunaarnersuaqassappat allatulluunniit annilaarnartumik pisoqassappat tusagassiarineqartut naalakkersuisunit aatsaat akuerineqaqqaarlutik saqqummiunneqartarnissaat inatsisiliuunneqarpoq.
Ajunaarnersuillu pineqartut ilaatigut tassaatinneqarput, nunami ajunaarnersuit, soorluttaaq maanna Kinap kujasinnerusortaani qarsutsinermik kinguneqartumik maanna taama pisoqartoq. Taamatuttaaq uuliamik mingutitsinersuit soorlu aamma decemberimi tamanna Kinami pisoq.
Inatsisissami tassani aamma ilanngunneqassaaq, inuit akornanni aaqqiagiinnginnerit, soorlu naalakkersuisunut akerliussutsimik takutitsinerit. Assersuutigalugu siorna inuit tusindtilikkaat naalakkersuisunut akerliullutik pikititsipput politeerpassuarnik akiorneqarlutik.
Tassalu imaappoq tamakku siunissami naalakkersuisut akuersiteqqaarnagit innuttaasunut tusarliunneqartalerpata taava tusagassiorfiit koruuninngorlugu 30.000-iniit 60.000 koruunit tungaanut akiliisinneqartalissapput.
Inatsisissaq taanna Kinami kattuffiit arlalippassuit akerlereqaat, tamakku oqarput tusagassiortunut akornusiinerussasoq inuppassuillu tusartariaqagaannut inatsit taanna akornusiissasoq.
Kinami tusagassiorneq nakkutigineqareersuuvoq, tassami kommunistit sunniiniartartuisa namminneq aalajangersarusunnerusarpaat qanoq tusagassiisoqassasoq, tusagassiortullu namminersuutigalugu tusagassiaat inerteqqutigineqartarlutik.
