Nakkutilliineq qasungavallaarsimavoq
Oqaatigineqartutut "Pissutsit isumakulunnartorujussuit atortinneqarmata", umiarsuaaqqamut atuarfiusitigisumut Tûgdlimmut akuersissussut atorunnaarsinneqareersorlu, Ilaqutariinnermut Naalakkersuisoqarfik taama nalunaarpoq.
- Massakkut malittarisassiorpugut, nakkutilliinerup assigiiaarnerusumik pisinnaanera pisussaaffillu aallavigalugu ingerlanneqarsinnaanera siunertaralugu, Lise Lennert Olsen oqarpoq.
Namminersorlutik Oqartussat nakkutilliinissamut pisussaaffeqarput, malittarisassanili allassimanngilaq, nakkutilliiartornerit qanoq akulikitsigissasut suullu eqqumaffigineqartassanersut.
Pissutsit isumakulunnartorujussuit atortinneqarnerat paasisaqarfigineqarmat Tûgdlimmut ulloq unnuarlu angerlarsimaffitttut akuersissut Naalakkersuisut atorunnaarsippaat.
Kisianni sooruna taama utaqqisoqartigisoq?
Radioaviisimi siusinnerusukkut oqaluttuaraarput, pissutsit isumakulunnartut ukiut qulit missaani atuussimasinnaasut.
Pisortat paasissutissaataannik Radioaviisi paasissutissinneqarmat, taakkunani takuneqarsinnaavoq, meeqqanut persuttaasoqarnera pillugu nalunaarutiginnittoqartarsimasoq, parnaarussisoqartarsimasoq, sumiginnaasoqartarsimasoq, atuartitsisoqartarsimanngitsoq, soorluttarlu eqqiluisaannginnikkut meeqqat arlallit kilalersimasut (fnat) anillanneqalerlutillu.
Tûgdlimmut 2009 januaarimi nakkutilliiartoqarpoq iluarseqqusallu ilumut iluarsineqarsimanersut qularnaarniarlugit ukioq taanna maajimi nakkutilliiartortoqaqqilluni:
- Taamani paasineqarpoq, pissutsit uparuarneqartut ilaat aaqqinneqarsimasut. Taava tassa 2011-mi nakkutilliineq ingerlanneqaqqimmat paasineqarpoq, susoqartariaqartoq.
Tassalu ukiuni marlunni nakkutiilliiartortoqarsimanngilaq.
Lise Lennert Olsen, nakkutilliiartortarnerit naammassimappat?
- Una ilinniarfigaarput.
Pisunut akisussaaqataavisi?
- Isumaqarluinnarpunga akisussaaqataasariaqartugut, meeqqat inuusuttullu ajunngitsumik ingerlasinnaanerat pillugu, Lise Lennert Olsen akivoq.
Taammalu neriorsuivoq, ilaatigut nakkutilliiartortartussanik marlunnik atorfinitsitsinikkut sukaterisoqassasoq:
- Sukaterinermi nakkutilliisussanik immikkut atorfinitsitsineq malittarisassiornerlu aallaaviussapput., Naalakkersuisoqarfimmi pisortaq Lise Lennert Olsen oqarpoq.
