Folketingimut ilaasortaasimasut: Najuunneq iluaqutaasarpoq
Folketingemi ilaasortaq attaaviitsoq Aleqa Hammond danskit naalakkersuisuinik isumaqatiginniarnissamut qaaqqusaagaluarluni nunatsinniimmat, nutaarsiassani ataasinngormat oqaluttuarineqarpoq.
Folketingemut ilaasortaasimasut, Hans-Pavia Rosing aamma Doris J. Jensen KNR-imit aperaagut, pingaarutilinnik isumaqatiginniartoqartillugu Folketingemiinniissaq qanoq pingaaruteqartigineqarsoq.
Aleqa Hammondip folketingemiinnani nunatsinniinera pillugu Hans Pavia Rosingip Doris J. Jensenillu oqaaseqarfigerusunngilaat.
Taakkuali Folketingemi ilaasortatut misilittakkatik aallaavigalugit oqarput, politikkikkut sulitilluni nammineq najuukkaanni angusaqarnarnerpaasoq.
AAMMA ATUARUK Isumaqatigiinniarnerit ingerlanneqaraluartut Aleqa Folketingimi najuutinngilaq
Doris. J Jensenip eqqaavai folketingemi najuussinnaannginnermut pissutaasut arlaqarsinnaasut, tassallu ataasimiigiarnissamut kingusissumik aggersarneqarsimagaani, timmisartumi inissat ulikkaaqqasinnnaagamik imaluunnit sila ajortillugu angalasoqarsinnaanngittarmat. Taamaattoqarneranili Skype imaluunniit oqarasuaatit atorluarneqarsinaapput.
- Folketingemi najuulluni ataatsimeeqataalluni isumaqatiginninniarlunilu qularnanngitsumik angusaqarfiunerusarput.
Doris J. Jakobsenip parteeqataa Folketingemilu ilaasortaasimasoq Hans Pavia Rosing aamma taama isumaqarpoq. Taanna Siumut sinnerlugu Folketingemut 1987-miit 2001-imut ilaasortaavoq.
Taamani Folketingep Kalaallit Nunaannut inatsisai pillugit ataatsimiititaliaasuni siulittaasuuvoq.
- Pingaaruteqarpoq. Imatut paasillugu; najuutinngikkaanni sunniuteqartoqarsinnaanngilaq)), Hans Pavia Rosing oqarpoq, imal itisiliivoq.
- Misigissutsinut suleqatigisanullu attaveqaatinullu tunngasuuvoq. Isumaqatiginninniarnermu qanoq pissusilersornerit pingaaruteqarput. Aamma suliffiuvoq. Folketingimut qinigaasimagaanni, taava pisoqartillugu najuunnissaq piusariaqartoq, uanga isumaqarpunga, Hans Pavia Rosing oqarpoq.
