Najummassimanartorsiorneq ilorraap tungaanut saakkiartulerunarpoq

Iranip Tuluit Nunaatalu akornanni najummassimanartorsiorneq immaqa ilorraap tungaanut saakkiartulerpoq. Iranip piffissami kingullermi nalunaarutigaa, sakkutuut umiartortut tigummineqartut iranimiut eqqartuussiviannut sassartinneqarnavianngitsut.

Tuluit nunanut allanut ministereqarfiata iranimiut nalunaarutaat ajunngitsumik tiguaat. Tassa iranimiut nalunaarmata, sakkutuut umiartortut tigusatik eqqartuussivimmut sassartinneqarnavianngitsut, tuluit akinasuarput, oqarlutik, aaqqiagiinnginnertik naalagaaffiit akornanni oqaloqatigiinnikkut qaangerniassallugu piareersimallutik.

Iranimiut isumannaatsuunissaq pillugu siunnersuisoqatigiiffianni pissaaneqaqisumi siulittaasoq tuluit nutaarsiassaqartitsiviannut ippassaq unnukkut oqarpoq, tuluit umiartortut tigummisatik eqqartuussivimmut sassartinneqarnavianngitsut. Ilanngulluguli oqaatigalugu tuluit ajornartorsiummik aaqqiinianngippata, tuluit umiartortut 15-iusut eqqartuussivimmut sassartinneqarumaartut. Aamma taassuma siunnersuutigaa tuluit sinniisuutitaminnik Iraniliartitsissasut aaqqiagiinnginneq oqaloqatigiissutigineqarsinnaaniassammat.

Maanna ullut aqqaneq-marluk qaangiussimalerput iranimiut killeqarfimmik nakkutilliisuisa tuluit sakkutuui umiartortut Persiap Kangerliumarngani tigusarimmatigilli. Taamanili pissutsit unittooqqasutut ipput.

Tuluit tigusarineqartut arlaleriarlutik tv-kkut takutinneqartarput. Iranimilu naalagaaffiup radiua naapertorlugu, tigusarineqartut tamakkerlutik Iranip imartaanut pisoorsimanertik nassuerutigisimavaat.

Iranip piumasaraa Tuluit Nunaat utoqqatsissasoq, kisianni Tuluit Nunaat utoqqatserumanngilaq. Taamaattorli nunat taakku marluk akornanni attaveqaqatigiittoqalersimagunarpoq.