KNR Najukkani tv-qarfinnik suleqateqarnerulernissaq
Ulloq 1. september aallarnerfigalugu piffinni nutaarsiassat KNR TV aqqutigalugu nuna tamakkerlugu saqqummiunneqartalissapput (aamma www.knr.gl aqqutigalugu silarsuarmi sumiluunniit takusassiarineqarsinnaalissallutik).
Tamatumani pineqarput;
- Nunatta kujataa, KNR Kujataa-imit aallakaatitassiorfigineqartartoq
- Nuuk, Nuuk TV aqqutigalugu aallakaatitassiorfiusartoq
- Sisimiut, Sisimiut TV aqqutigalugu aallakaatitassiorfiusartoq
- Ilulissat, Arctic TV aqqutigalugu aallakaatitassiorfiusartoq
Tamatuma saniatigut illoqarfinnit allanit aallakaatitassiortoqartarsinnaasarnissaa siunissami takorloorneqarsinnaavoq.
Tamatumani KNR-ip pingaartissimavaa piffiit pineqartut tusagassiornernik ingerlatsinissamut misilittagaqarluartunik sulisoqarsimanissaat, aammalu amerlanertigut tassani tusagassiornermik sulisoq atorlugu aallakaatitassiassat suliarineqarsinnaasassammata.
Immiunneqartartut pitsaassusaat qaffassarnissaat
KNR-ip tungaanniit angusaqarfiulluartumik Danmarks Radio ataatsimeeqatigineqaqqammerpoq. Tamatumani sorpassuit siunissami suleqatigiissutigineqarsimasut qaqinneqarsimapput. Tamanna pillugu ungasinngitsukkut immikkut nalunaaruteqartoqarumaarpoq.
Sulissuteqarfigisagut ilaatigut tassaapput KNR-mi piffinnilu TV-qarfinni sulisunik suleqatigiinnikkut pikkorissaasarnissanik ingerlatseqatigiittarsinnaanissat.
Tamatumani uagut aammalu piffinni TV-qarfiit sulisuisa piginnaaneqarnerulernissaat aqqutissiuuneqartassaaq, neriuutigaarpullu kingunerissagaa isiginnaartartut iluarusunnerulernerinik malittaqarnissaa. Tamatuma saniatigut suleriaatsit eqaallisaavigineqarnissaat.
Periarfissaq manna atorlugu Nuuk TV, Sisimiut TV aammalu Arctic TV qujassuteqarfigiumavakka, pisussat piviusunngortinniarnissaat siunertaralugu oqaloqataarusussimammata tamatumali saniatigut aqqutissaasinnaasut eqqarsaatigalugit siunnersuuteqartarsimanerat pillugu.
Ilanngullugit qujassuteqarfiginiarpakka KNR’p nutaarsiassaleriffia taamatullu Qaqortumi immikkoortortaqarfipput, taakkumi tamarmiullutik nutaaliorniarluta suliniuteqarnitsinni tunulequtsiilluarsimammata.
Inussiarnersumik inuulluaqqusillunga,
Jacob Abelsen, KNR-ip pisortaa
