Najukkamiilluni perorsaasunngorniarneq kommunit akissaqartittariaqarpaat

Meeqqat ajornartorsiutillit ikiorserneqarnissaat, Meeqqerivitsialaap aallartinnissaa allarpassuillu ilaqutariit meerartallit inuunerannut pitsanngorsaataasussat taakkartorneqartuarput. Pisariaqartinneqarnerpaalli tassaapput perorsaasut ilinniarsimasut. Najugaq qimannagu perorsaasunik ilinniartitsinissaq pingaarnerpaanngortariaqartoq, Kaaliina Skifte, Perorsaasut Ilinniarsimasut Kattuffiata PIP-p siulittaasua oqarpoq.

- Nunatsinni perorsaasut ilinniarsimasut 300-t sinnerlugit amigaatigineqarput. Ajornartorsiut taanna perorsaasutut sulinerup annertussusianut naleqqiullugu akissarsialunnerunitsinnik aallaaveqarpoq, Kaaliina Skifte nassuiaavoq.

Perorsaasut amigaataasut ikiliartornerannut iluaqutaallualersimavoq najugaq qimannagu perorsaasunngorniarneq.

-Nuummi najugaq qimannagu ilinniartut siulliit 2007-imi naammassipput tulliilu 2008-mi aallartillutik. Holdit nutaat aamma Sisimiuni Ilulissanilu aallartereerput. Qaqortumi aamma ukiormanna aallartittoqarnialerpoq, tassanili aningaasassaqarneq apeqqutaassaaq, PIPip siulittaasua oqarpoq.

Najugaq qimannagu perorsaasunngorniarlutik Tasiilami Paamiunilu arlallit aallartinniarlutik aamma piareersimagaluartut oqaatigaa, aporfiunerpaanerarpaalu kommunit ataasiakkaat aningaasaqarniarnerat.