Najugaqariaaseq nutaaq misiligutitut illuliornikkut nalilersuiffigineqalersoq

Nunatsinni silap pissusianut nunallu ilusaanut naleqqussarluarsinnaasunik nutaanik illuliortaatsitut ilusiliiniarneq siunertaralugu misiligutitut illuliortoqassaaq.

Silap pissusiinut assigiinngitsunut immikkoortunut marlunnut tulluarsakkamik, tassalu kissartumut nillertumullu, issittumi inissiamik qanoq sanasoqarsinnaanersoq qulaajarniarlugu misiliisoqarniartoq, Kommuneqarfik Sermersooq tusagassiorfinnut nalunaaruteqarluni taama nassuiaavoq.

Taakku silap pissusiinut tulluarsakkat immikkoortut assigiinngitsut marluk qisummik, polykarbonatimik qallerlugit, sanaartorneqassapput.

Taamaalilluni illup qalliutaa silarleq, qisummik sanaap qaavaniittoq, illu naatsiiviusatut pissuseqassaaq, taamaalillunilu taakkunani immikkoortuni marlunni kissaq - pingaartumik ukiukkut - assigiinngitsorujussuussalluni.

Suliniut Venedig Biennale 2012-imi saqqummersinneqartunut ilaasoq Danmarks Tekniske Universitetimit aamma Tegnestuen Vandkunstenimit suliaavoq.

Ilaqutariit illumi assigiinngitsunik uuttortaasartussat DTU-mit inissinneqassapput. Nunatsinni silap pissusianut, isugutammut nukissiuutillu eqqarsaatigalugit, illup qanoq innissaata paasiniarnissaa pingaarnertut siunertaavoq.

Illu misiligutaasussap pilersaarusiornissaanut, sanaartornissaanut nalilersuiffigineqarnissaanullu A.P. Møllerske Støttefond 10 millionit koruuninik tapiissuteqarpoq.

Illup misiligutip suliarineqarnera 2017-ip ukiaanerani ingerlanneqarnissaa naatsorsuutigineqarpoq. Pilersaarutillu malillugit naammassineqassappat ukioq taanna ukiakkut illu nuuffigineqarsinnaassaaq.