Qulaarpaa Najugaqarfiit ima mianerisariaqartigivoq

Najugaqarfiit mikinerusut, pingaartumillu Nunatta kujataa, innuttaasut agguataagaaneranni mianerisarialittut inissisimapput. Aningaasaqarnermut naalakkersuisoqarfiup nassuiaataani nutaami tamanna atuarneqarsinnaavoq.

Nassuiaat nuna tamakkerlugu pilersaarusiami nutaami najugaqarfiit mianerisarialittut nalilerneqarnissaannut uuttuutit quliusut tunngavigalugit suliarineqarpoq Nunatsinnilu najugaqarfinnik tamaginnik missuiffiulluni.

Kujataani nunaqarfiit tamarluinnarmik mianernartumik inissisimapput

Misissunermilu angusat pingaartumik Kommune Kujallermi najugaqarfinnut mikinerusunut nikalluallannartuupput. Kujataata kommuniani najugaqarfiit 1000-it inorlugit innuttaasoqartut tamarmik innuttaasut agguataagaanneranni mianerisarialittut nalilerneqarnissaannut naammassisassanit quliusunit ikinnerpaamik arfinilinni pitsaanngitsumik inissisimapput.

Tunngavissat pineqartut tassaapput innuttaasut utoqqaat amerlassusaat, arnat angutinit ikinnerunersut, toqusartut inunngortunit amerlanerunersut aammalu najugaqarfimmit nuuttartut najugaqarfimmut nuuttunit ikinnerunersut.

Aamma atuaruk Nunaqarfiit 18-it inueruteratarsinnaapput

Kommunini allani pingasuni najugaqarfiit mianerisarialittut inissisimasut amerlassusaat assigiiaarnerusumik agguataarsimapput, najugaqarfiilli ilarpassui tunngavissani amerlanerpaamik tallimani mianerisarialittut inissisimallutik, taamaammaat aamma innuttaasut agguataagaaneranni imminnut napatissinnaanerullutillu aalaakkaanerusumik inissisimapput. Kommune Kujallermi najugaqarfiit tamarmik tunngavissat affaanni mianerisarialittut inissisimapput taamaattumillu innuttaasut agguataagaaneranni mianerisarialittut isigineqarlutik.

Mikinerusut ajornerusumik inissisimapput

Nunaqarfiit sisamat ajornerpaamik inissisimapput, taakkumi tunngavissanit quliusunit qulingiluani mianerisarialittut inissisimammata. Nunaqarfiit marluk Kujallermiipput, Sermersuumi ataaseq Qaasuitsumilu ataaseq.   

Najugaqarfiup angissusia tunngavissatut atorneqanngikkaluartoq najugaqarfiit mikinerit mianerisarialittut inissisimapput najugaqarfiit anginerusut ajunnginnerusumik inissisimallutik. Tamannalu innuttaasut agguataagaanerannut aammalu najugaqarfiup ataannarnissaminut periarfissaanut tunngatillugu atuuppoq.

Nunatsinni nuttarneq pillugu Qulaarpaa unnugu oqallitsitsissaaq. Kalaallisut nal. 19.30, qallunaatullu nal. 20.30 aallakaatinneqassalluni.

Mianerisarialittut inissisimasut allattorsimaffiat

Nassuiaat ataani kakkiunneqarpoq (qallunaatut allassimavoq)