Naja Paulsen: Folketingimut qinersinissaq nalinginnaasumik ingerlavoq

Folketingimut qineqqusaartussat aatsaat saqqummiussuunneqalerneri piumassuseqannginnermik takutitsisuunngilaq nalinginnaasuuvorli, politikkimi malinnaasoq taama oqarpoq isumaqarlunilu qinersineq kalaallinut pingaaruteqartoq.

Danskit folketinngimut juunip 18-ni qinersinissaannut nunatsinniit ilaasortassatut imminnut piukkuttut maannamut saqqummertut marluinnaagallarput, taakkuli  inuit ataqatigiinneersuupput, tassa Johan Lund Olsen aamma Mute B. Egede.

Aamma atuaruk Múte B. Egede Folketingimut qinigassanngortittoq

Maannamut qineqqusaartussat amerlanerunnginnerat immikkuullarissuunanilu piumassuseqannginnermik takutitsisuunngitsoq, politikki pillugu malinnaasoq oqaaseqartartorlu taama isumaqarpoq.

- Ataatsimut isigalugu eqqarsaatigisariaqarpoq ukiut siulii maani inatsisartunut qinersisoqarnikuuvoq tulleriiginnarnik. Taakkulu partiinut annertuunik aningaasartuutaanikuupput, taamaattumik folketingimut qinersinissaq massakkut immaqa amerlanerit naatsorsuutigisimagaluarpaat ukiamut pissasoq, Naja Paulsen oqarpoq.

Aamma atuaruk Qinigassanngortinneqartussat kikkuuneri partiinit suli piareersimaffigineqanngitsut

Qinerneqartussallu iserunik suliassarpassuaqarput. Taassumami erseqqissarpaa, suliassaq kalaallit nunaat sinnerlugu folketingimut ilaasortaaneq tassaasoq pingaarutilerujussuaq.

- Qinersiviup kingulliup ingerlanerani, soorlu pituffimmi sullissinermut tunngasut issittumilu illersornissamut tunngasut tamakku oqallisaaneranni sinnerluta folketingimut ilaasortaqarneq, eqeersimaartunik suliassaminnullu ilisimaarinnittunillu pisariaqartoq takutinneqarpoq. Taamaattumik taamatut pisariaqartitsineq ingerlaannartussaavoq ukiuni tulliuttuni aamma, Naja Paulsen oqarpoq.

 

Suliassaat arlallit

Nunatta issittumi inississimanerata aningaasaqarnera sammisassat ilagissavaat. Aamma nunanut allanut tunngasunut, illersornissamut aamma sillimaniarnermullu tunngasunut politikkit suli nunatta oqartussaaffiginngisai, aamma nersutinut suliaqartarnermut tunngasunut uumasuuteqarnermullu tunngasunut inatsisit taakkuupput politikkikkut malinnaasartup folketingimut ilaasortaalersussat suliassaasa ilagisassaattut ilimagisai.

Aamma atuaruk Pisortatigoortoq Folketingimut juunip 18-iani qinersissaagut

Taamaattumik qinersinissaq nunatsinni qinersisartunut pingaaruteqartoq taanna isumaqarpoq.

- Kalaallit sinnerlugit folketingimi sulisoqarnissaa pisariaqartikkatsigu naalagaaffeqatigiinnerup tamanna piumasaqaatigimmagu. Aamma apeqqutit pingaarutillit Danmarkimi nunarput pillugit oqallinnermut tunngasut folketingimut ilaasortaasut suli sakkugalugit oqallisigineqartarmata, Ilisimatusarfimmi tusagassiornermut immikkoortortaqarfimmi aqutsisoq Naja Paulsen taama oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl