Naja Arctica misilerarneqalerpoq

Royal Arctic Linep umiarsuaa Naja Arctica Nuummi anorersuaraa aqunneqarsinnaajunnaarnermi kingorna inuttanik tusarniaasoreersoq, misissuisoqareersorlu misilerarlugu aaqagu avalatsinneqassasoq Royal Arctic Linemi tusagassiisartoq Ivalo Egede oqarpoq.

Naja Arcticap sarpii aamma aquuta aqqartartunik misissorneqarput. Naak sarpiisa ulornai 2,5 meterinik takissuseqartut sisammik kanngussammillu sanaajugaluarlutik, tamarmik sisamaallutik ajoqusersimapput, taamaakkaluartorli ima ajunngitsigipput ilimagineqarsinnaalluni sarpiisa ulornai narlorissalaarneqareerunik aqunneqarsinnaassasut.

Sillimmasiisarfiup aamma tyskit suliffeqarfiutaata, sarpinnik sanasimasut, umiarsuup angalasinnaanera akueraat, taamaammallu aqagu misilerarneqassaaq.

Misileraalluni avalareernerup kingorna aalajangerneqassaaq ’Naja Arctica’ Danmark-imut amutikkiartorluni angalasinnaassanersoq. Atlantikoq ikaarlugu pajuttaat umiarsuaq alla, tassalu ’Irena Arctica’, kujammut Danmarkip tungaanut ingiallortaasinnaassaaq, aqqutaani ajornartorsiortoqalissagaluarpat ikiuussinnaaniassagami.