Naja Abelsen Taseralimmi saqqummersitsivoq

Naja Abelsen Kalaallit Nunaanni meeraasimasoq, 1980-imi Danmarkimut angajoqqaani ilagalugit nuuppoq, tassani ilaatigut Designskolen-imi ilinniarsimalluni. Maanna qeqertaaqqami Ærø-mi najugaqarluni. Danmarkimi peroriartoraluarluni, Najap kalaaliussutsini katanngisaannarsimavaa. Eqqumiitsuliortuunermini kalaallit oqaluttuatoqaat, pinngortitaq uumasullu aallaavigilluartuuai, taamalu aamma Kalaallit Nunaanni frimærkit arlalippassuit saqqummersissimallugit. Titartaajuartuuvoq, namminerlu ima saqqummersitani oqaatigai:

-Uumassusillit uumassuseqarnerisalu tarneri tassaapput sulianni saqqummertartut. Immitsinnut paasinnissinnaanerput uumasullu iluminni qanoq issusaat—kissassutsip Asanninnerullu pigisaasa paaserusunnerat. Aamma qanga siulitta silarsuarmik paasinnittaasiat upperisaallu paaserusunnartarput. Tamakkulu saniatigut titartaanermi qalipaanermilu misileraaneq. Sapaatip akunneranut akunnerpassuit atorlugit avatangiisitta timittalu ilusiisa titartarnissaat ilinniartarpakka, assiliaq atorlugu saqqummiukkusutakka titartarsinnaajumallugit. Sulialli ilai, assit ulluinnarnilu titartartakkakka atorlugit pinngortarput.

Naja Abelsen nunani assigiinngitsorpassuarni saqqummersitsisareerpoq aammalu Katuami 2006-imi saqqummersitsinikuulluni. Katuami saqqummersitsinermi tunisilluarsimavoq, allaat tunisilluarnerpaat ilagisimallugu. Taseralimmi saqqummersitsinermi tunisaqalaareerpoq, sulili tunisaqarluarnissani neriuutigaa – aammami allaffeqarfiit angisuut arlallit Sisimiuniimmata.