Naggueqativut sisamat nersornaasigaapput

Indianerit, naggueqatigiit métis Inuillu, ikittunnguit nunap inuiinut nersornaasiuttakkamik akimanerpaamik ukiut tamaasa nersornaaserneqartarput. Nersornaat taanna taaguuteqarpoq Aboriginal Achievement Award, inunnut namminneq naggueqatiminnut, kulturikkut, ilinniartitaanikkut politikkikkulluunniit kusanartumik assissaqanngitsumilluunniit iliuuseqarsimasunut tunniunneqartarpoq.

Nersornaat inunnut 15-inut ukioq-manna tunniunneqassaaq, naggueqatigiit Inuit taakkununnga ilaallutik. Taakkunannga sisamanit pingasut Canadami inatsisartuni ippassaq ualikkut ersaartaanneqarput, akissarsisinneqarnerannut tunngavilersuutit inatsisartunut ilaasortat tusarnaareeraallu.

Nersornaatisisussarli ataaseq tassa amigaatigineqarpoq. Taanna tassaavoq Mitsimatalimmeersoq Annie Peterloosie, sapaatip-akunnerata ataatsip matuma siorna toqusoq, naggueqatigiinnullu Inunnut kulturikkut sullissisimanini pillugu toqoreernermi kingorna maanna tassa nersorniarneqartoq.

Nersornaatisisut sinneri, tamarmik arnaasut, tassaapput Nunavimmi Makivimmi Pisortaqarfimmeersoq, Minnie Grey. Nunap immikkoortortaani tassani, naggueqatigiinnillu Inunnik sullissilluarnini pillugit, taanna nersornaasigaavoq. Aappaa tassaavoq Violet Ford, Nunatsiavummeersoq. Taanna eqqartuussissuserisuuvoq, Minnie Grey-ilu assigalugu Inuit Issittormiut Siunnersuisoqatigiiffianni, ICC-mi, siulersuisunut ilaasortaasimalluni; inatsisinut inatsisilerinermullu tunngasunut tapersersuisarnini pissutigalugit taanna akissarsisinneqarpoq.

Nunavummeersoq, Leona Aglukkaq, Canadami peqqinnissaq pillugu ministeriusoq, Issittumilu Siunnersuisoqatigiit Nuummi ukioq-manna siusinnerusukkut ataatsimiinneranni Nunavut sinnerlugu peqataasoq, akissarsisinneqartut pingajoraat. Politikkikkut suliniuteqarnini taassuma akissarsissutigaa.