Naggueqativut peqqinnarnerusunik nerisaqalissapput

Canadami aningaasanut inatsimmi inuit Canadap avannarpasinnerusuani najugaqartut akikinnerusunik peqqinnarnerusunillu nerisassarsisinnaalernissaannut 225 miilionit koruunit aningaasaliissutigineqarput.
Allattoq Elisa Isaksen
marsip 08-at 2010 04:39

Canadami aningaasanut inatsisissaq nutaaq, inatsisartunut sapaatip akunnerani matumani saqqummiunneqarpoq.

Canadami naggueqatigiit Inuit kattuffiannit, Inuit Tapiriit Kanatamimit piffissami sivitsortumi naalakkersuisut, nunaqarfinnut illoqarfinnullu avannarpasinnerusuniittunut amerlanerusunik aningaasaleeqqullugit qinnuigineqartarput, matumani Canadap issittumi oqaasissaqarnera naalakkersuisunit erseqqissarneqassappat, nunaqarfimmiut illoqarfimmiullu avannarpasinnerusumiittut peqqissuunissaat tunngavilersuutigineqartarluni.

Aningaasaliissutigineqartut ilaat nunap avannarpasinnerusuinut nerisassanik assartuinermut akinut apparsaatitut atorniarneqarput, taamaalilluni nerisassat akikinnerulerniassammata. Assersuutigalugu Canadap avannarpasinnerusuani immuk liiteri ullumikkut 20 imaluunniit 25 koruuneqarpoq. Inuillu amerlaqisut cola akikinnerummat pisiarerusunnerusarpaat.

Aningaasanut inatsimmi nutaami naggueqatigiit Inuit ilinniagaqarnissaat amerlanerusunik aningaasaliiffiginiarneqarpoq, soorluttaaq peqqissuunissamik isumaginninneq aamma pitsanngorsaaviginiarneqartoq.