Naggueqativut nalliuttorsiornermi katersuupput

Akilinermi naggueqativut Inuit hunnorujukkuutaarlutik Inuialuit Nunaanni illoqarfimmut Inuuvimmut ulluni makkunani tikerarput.

Taakku ilumoortussaq saammaasseqatigiinnissarlu pillugit isumalioqatigiissitap ukiumoortumik nalliuttorsiortitsinissaanut pingaartinneqaqisumut peqataajartorput.

Isumalioqatigiissitaq 2008-mi pilersinneqarnermi kingornagut, aappassaannik taamatut nalliuttorsiortitsisussaavoq. Taamanimi Canadami naggueqatigiit Inuit meerartaat ukiuni hunnorujuni sinnilinni pinngitsaalillugit atuariartortitaasarsimanerat pillugu pisortatigoortumik utoqqatserfigineqarnerisa kingorna, isumalioqatigiissitaq pilersinneqarmat.

1870-ikkunniit 1996-imut Canadami nunap inoqqaavisa meerartaat pinngitsaalillugit Canadami nunap ilaanut sumut tamaanga atuariartortinneqartarput. Atuarfinni tamakkunani timimikkut anniartinneqartarput kinguaassiuutimikkullu atornerlunneqartarlutik, sulilu amerlanerusut ilitsoqqussaralugu oqaatsiminnik oqaloqqusaaneq ajorlutik.

Atuarfinni tamakkunani atuartuusarsimasut tuusintit angullugit amerlassusillit, Inuuvimmi ukiumoortumik nalliuttorsiornermi peqataanissaat naatsorsuutigineqarpoq, tamannalu piareersagassaangaatsiartussaavoq, tassami illoqarfik 3.500-innarnik inoqarmat.

Saammaasseqatigiinnissaq pillugu suliniarneq soqutigineqaqaaq. Tassami qaammatit siuliini, soorlu Radioaviisimi oqaluttuareriikkatsitut, illoqarfinni 19-ini innuttaasunik ataatsimiititsisoqartarpoq, atuartuusimasut ilaqutaallu misigisaminnik oqaluttuartinneqartarlutik.

Ataatsimiititsinernut taamaattunut ataatsimeeqataasut ilagaat Sandra Lockhart, pinngitsaalisaalluni nuutsitaanermini misigisaminik aliasunnerujussuarmik kingumut misigisaqaqqittoq. Taassumali ataatsimeeqataanini uggorinngilaa.

- Inuit ilaasa takorloorpaat, nukittussuserput taamanikkut annaasimagipput. Kisianni qamuuna nukittussuserput annaanngilarput. Asserneqaannarpoq. Anniaatikka iperarakkit nukittussusera saqqummeqqippoq, Sandra Lockhart CBC Newsimut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat