Naggueqativut Montreaulimiittut angerlarsimaffeqanngitsorpassuit

Najukkami ikiuiniaqatigiiffiit arlallit kattullutik taakku ikiorniarlugit maanna sulissuteqaleruttorput.

Naggueqativut 1200-t, Nunavimmiut qulerarterutaat, Montreaulimi najugaqarput. Taakku affaat angerlarsimaffeqanngitsuupput, Montreaulip aqquserngini illoqannginnersanilu najugaqartuullutik.

Nunaviup nunaqarfiinit 14-init Montreaulimut nuussimapput. Taakku ilaat napparsimmavissuarmi suliaritereerlutik nuuinnarsimapput ilaalluni parnaarussivimmeereerlutik aamma nuuinnarsimallutik. Allat angerlarsimaffimminnit qimaasimasuupput imaluunniit illoqarfissuarmi inuuneq pilerigalugu nuussimallutik.

Angerlarsimaffeqanngitsut amerlanersaat tuluttut franskisullu oqalussinnaanngillat, inuktituinnarlu oqalussinnaallutik. Pingaartumillu arnat inuuniarnermikkut ajornartorsiortorujussuusut oqaatigineqarpoq.

Najukkami suliniaqatigiiffiit ilaat, Raising the Roof, angerlarsimaffeqanngitsunut ilitsersuummik suliaqaqqammerpoq. Assit atorlugit sumi unnuiffissarsisoqarsinnaanersoq, nerisoqarsinnaanersoq atisanillu pissarsisoqarsinnaanersoq nassuiarneqarluni. Ilitsersuummuttaaq ilaavoq allagartaq kissartunik nerinissamut akiliutissaq.

Donat Savoie, suliniaqatigiiffik Makivik peqatigalugu angerlarsimaffeqanngitsunik sullissisuusoq KNR-imut oqaluttuarpoq Montreaulimi oqartussaasut angerlarsimaffeqanngitsut isumannaatsumik najugarisinnaasaannik pilersitsinissaat pingaaruteqartoq.

Montreaulimi angerlarsimaffeqanngitsut 600-t missaat ikiorserniarlugit suliniaqatigiiffiit arlallit aaqqiissutissanik allanik nassaarniarlutik aamma suliaqaleruttorput.