Naggueqativut marluk nersorniarneqalerput
Naggueqatigiit Inunneersut marluk ilisimaneqarluartut, Canadami general-guvernørip, David Johnstonip, Ottawami nalliuttorsiualaarnikkut nersornaaserniarpai. Nersornaat taaguuteqarpoq Canadas Nordlige Medalje, Canadap Avannarpasissuani Nersornaammik kalaallisuunngortinneqarsinnaasoq. Issittumi qaqutigoortumik sulilluarsimasunut nersornaat taanna tunniunneqartarpoq, uppik issittormiu arsarnerillu diamantinik issittumeersunik sanaat pinnersaataallutik.
Nersornaaserneqartussap aappaa tassaavoq Zacharias Kunuk, Illulimmeersoq, tassaasorlu Canadami filmilianik ilitsersuisartoq ilisimaneqarluartoq. Filmi ilitsersuisuuffia, Atanarjuat, Cannesimi 2001-imi filmfestivalertoqarnerani ajugaavoq, ilitsersuisartumit aatsaat saqqummersumit suliatut kusanartutut ukioq taanna assut nersorneqarluni. Zacharias Kunuk taamanimiilli allanik aamma filmiliortarpoq, nalinginnaasunik aamma internetsimut. Pilersissimasaanut ilaavoq ISUMA TV, taanna internetsikkut aallakaatinneqartarpoq, Canadami naggueqatigiit Inuit sammineqarnerusarlutik, aammali nunarsuatsinni nunap inuii aallakaatitassiarineqartarlutik.
Nersornaatisisussap aappaa tassaavoq naggueqatigiit Inuit suliniaqatigiiffianni, Inuit Tapiriit Kanadami-mi, siulittaasoq, Mary Simon. Naggueqatigiit Inuit pitsaanerusumik ullutsinnullu naleqquttumik ilinniagaqartalernissaat suliniutaasa annersaraat. ICC-mi præsidentiusimavoq aamma Nunanut Issittunut Danmarkimullumi aallartitatut sulisimalluni. Mary Simon Radioaviisimut oqarpoq nersornaasigaanini ataqqinaatitut assut tigugini, nuannaarutigeqiginilu.
Nersornaat 2005-imi siullermik tunniunneqarpoq, taamanikkut nersornaasigaalluni ICC-mut taamani præsidentiusoq, Sheila Watt-Cloutier, Inunnut tallimaannarnut tunniunneqarnikuuvoq, taakkununngalu tassa ilaalerput Zacharias Kunuk aamma Mary Simon.
