Naggueqativut inuusuttut imminut toqunnissaminnik eqqarsartarunnaartariaqarput
Jennifer Watkins Canadami naggueqatitta inuusuttut peqatigiiffianni sapaatip akunnera ataasiinnaq præsidentioreerpoq, ajornartorsiulli annertoqisoq, tassa inuusuttut imminnut toquttartut amerlavallaarnerujussuat, maannangaaq sulissutigilereerpaa. Canadami naggueqatitta affaasa missaat 13-it 30-llu akornanni ukioqarput, tamakkulu akornanni imminut toquttartut amerlanerpaapput. Issittumi nunaqarfinni illoqarfinnilu 53-iusuni naggueqativut inuusuttut 30.000-it missaat najugaqartuupput.
Naggueqativut inuusuttut imminnut toquttartut canadamiunut inuusuttunut allanut naleqqiullugit aqqanileriaammik amerlanerupput, akuttunngitsumillu oqartoqartarpoq, naggueqatigut inuusuttut nunarsuaq tamakkerlugu amerlanerpaasut.
Jennifer Watkins aviisimit Winnipeg Free Pressimit oqaloqatigineqarluni oqarpoq, siunissami inuunissatsinnik oqarnissarput pisariaqanngitsoq, siunissameereerpugummi, MAANNALU iliuuseqartariaqarluta. Inuusuttut oqarfigerusuppakka kisimiinngitsut, ilumulli inoqartoq ikiuerusuttunik, tamannali ersarinnerusariaqartoq.
Inuusuttut neriuutissaqarpianngillat, tassami kujavarlutik atuarfinnut pitsaanerusunut atuariartorusuttanngillat ilinniartorusuttaratillu, taamaammat angerlarsimaannartarput arlaannillu, immaqa nuannarinngilluinnakkaminnik, suliffeqalersarput, neriuutissaqannginnerallu suli ingasannerulersarpoq.
Inuusuttut killinniartariaqarpavut ilumut pitsaasunik ajunngitsunillu ilinniagaqarnissamut periarfissaqartut, siunissamilu atorfissaqartinneqartut, Naggueqatitta Inuusuttut Peqatigiiffianni, National Inuit Youth Councilimi, præsidentinngorlaaq, Jennifer Watkins, oqarpoq.
