Naggueqatitta timmisartuutileqatigiiffiisa unammillerneqarnertik nuannarinngilaat

Timmisartortitseqatigiiffik Air Canada Nunavummut timmisartuussisalerniarpoq. Timmisartuussisalernissaq naggueqatitta timmisartuutileqatigiiffiannit First Airimit aamma Canadian Northimit, maanna Ottawap Iqaluillu akornanni timmisartuussisareersunit nuannaarutigineqarpallaanngilaq.
Allattoq Elisa Isaksen
novembarip 11-at 2009 06:17

Canadamiut timmisartortitseqatigiiffiat taanna marsimiit Ottawap Iqaluillu akornanni Montreal aqqusaarlugu ullut tamaasa timmisartuussisarniartoq, CBC News ilisimatitsivoq.

Angallanneq eqqugaassaaq aamma Nunavummut Quebecillu avannaanut akilersinnaasumik timmisartuussisarneq imminut akilersinnaajunnaassasoq, First Airumeersup CBC-mut oqaatigaa.

- Air Canadap Iqalunnut timmisartuussisarneq imminut akilersinnaanerpaammat toqqarpaa, taamaattorli timmisartuussinerit allat inukinnerusunik kiffartuussiffiusut, First Airip aamma Canadian Northip timmisartuussiffigisartagai angallavigerusunnaviarnagit, Canadian Northip siulittaasua Tracy Medve CBC-mut oqarpoq.

Naggueqatigiit Inuit timmisartuutileqatigiiffiisa taakku marluusut aamma tikkuarpaat, suliffeqarfimminni sapinngisaq naapertorlugu nunaqavissunik sulisoqartaramik.

- Inuiaqatigiinnut maani avannarpasissumi najugalinnut tapersiisarpugut. Air Canadap avannamut aqqut akilersinnaanerpaaq kisiat ingerlanniarpaa, aningaasakilliornerup nalaani tamanna naapertuilluanngitsuliorneruvoq, Tracy Medve oqarpoq.

Air Canadap Iqalunnut timmisartuusisarnini aappaagu marsip 28-anni aallartinniarpaa bilitsillu internetikkut tuniniarneqalereerput. Taakkua akigitinniagaat 659 dollarseqarpoq. Taamaattumik First Airip bilitsit 599 dollarsilerlugit tuniniarpai - taamaalilluni Air Canadamit 60 dollarsinik - tassa 300 koruuninik akikinnerutillugit.