Naggueqatitta pinngortitaq uuliaarluerfigeqqunngilaat
Saliinermik ilisimatusartussat tassaapput Bedfordip Imaani pissutsinik Ilisimatusarfiata Nova Scotiamiittup ilisimatuui.
Issittumi uuliamik mingutsitsisoqartillugu suut atorlugit pitsaanerpaamik saliisoqarnissaq maanna naammattumik ilisimaneqanngitsoq, ilisimatusarfimmit Ken Lee oqarpoq. Taamaammat saleeriaatsinik nutaanik nassaarsiortoqartariaqarsoraa.
Ilisimatusarfiup marraq aseqqorilluinnartoq kemikalianik - akoorutissanik arrortikkuminaatsunik - akuugaanngitsoq atorlugu saliinermik misileraaniarpoq.
Siunertaavoq kangerlummi misileraavissami sumiiffinnut qulinut 100 liiterikkaanik uuliamik maqitsisoqarnissaa.
Naggueqatigiit Inuit piaaraluni uuliamik mingutsitsisoqarnissaa nuannarinngeqaat.
Nunavumi avatangiisinut naalakkersuisoqarfimmi pisortaq John Amagoalik oqarpoq, misileraanissamut maanna piffissaanngitsoq. Ilisimatuut aggustimi septembarimiluunniit misileraalerniarput, kisianni piffissami tassanerpiaq qilalukkat takkusimaalersarmata, asuli uumasunik ulorianartorsiortitsisoqaannassasoq, Amagoalik oqarpoq.
Canadap avannaata imartaani aasap ingerlanerani misissuinerit arlallit ingerlanneqassapput, ilaatigut uuliamik gassimillu misissuinerit arlallit pissallutik. Aamma sakkutuut sungiusarnissarsuat pisussaammat, pisussat naammareeqisut, John Amagoalik isumaqarpoq.
John Amagoalik aamma taannaavoq, Lancaster Soundimik naggueqatitta Tallurutiup Imanga-nik ateqartitaata kangiatungaanik eqqissisimatitsilernissamik suliniuteqartut siuttuat. Canadami ilanngutassiortorput Marianne Stenbæk taama tusagassaqartitsivoq.
