Naggueqatitta oqaasiinik tammatsaaliuiniarput

Nunavumi naggueqatitta oqaasiinik tammatsaaliuinissaq anguniarlugu nutaamik inatsiliornissami Nunavumi tusilartut inuit ussersorlutik oqaluuttarneri immikkut ittut pisortatigoortumik atortarsinnaallugit akuerineqarnissartik ilimagisinnaavaat.

Nunavumi 155-t missaanni tusilartuupput taakkulu amerlanersaasa Canadap kujasinnerusortaani ilinniarsimasut amerikamiut tusilartut ussersuutaat oqaluussaqarnerminni atortarpaat. Amerikamiut tusilartut ussersuutigisartagaasa saniatigut inuit tusilartut oqaluussinerminni ussersuutigisartagai immikkullarissut paasineqarsimavoq. Tamanna 1999-imi angut tusilartoq Nunavup avannaani najugalik eqqartuussivimmi takunnittuusimanini pillugu apersorneqarmat maluginiarneqaqqaarpoq.

Amerikamiut tusilartut oqaluussinerminni ussersuutigisartagai atorsinnaasimanngilai taamaattorli ussersorluni nassuiaasinnaasimavoq. Ussersuutai inerisimalluarsimapput pisortatigoortumilli ilisimaneqarsimanatik.

Taamanikkut immikkut ilisimasalik aggersarneqarpoq angullu tusilartoq kisimeeqatigereerlugu nunallu inuiisa meerartai videomiut immiunneqarneri isiginnaareerlugit taassuma paasisimavaa tusilartut oqaluussaqarnerminni ussersorlutik oqaluussaqartaneri immikkuullarissut atorneqartartut.

Inuit tusilartut assaminnik ussersornermi saniatigut timertik kiinartillu atorlugu ussersortarput - tamanna immikkuullarissuuvoq.

Nunavumi oqartussat tusilartut taakkulu ilaqutaat qanittukkut isumasioqatigaat. Nunavumi tusilartut oqaluussinerminni ussersuutaasa pisortatigoortumik atulernissaat tusilartunit ilaqutaanillu isumasioqatigiinnermi kissaatigineqarpoq.

- Tusilartortatsinnik oqaluussinitsinni atortaratsigit neriuppugut akuerineqarsinnaassasut, tusilartumik ilaqutalik Canadami tusagassiorfimmut CBC-mut taama oqarpoq.

Nunavumi oqaatsit tammatsaaliniarlugit naalakkersuisut aappaagu inatsisartuni siunnersuusiaminnik saqqummiussissapput. Inuit tusilartut ussersuutai inatsisissatut siunnersuummi ilanngunneqarput. Siunnersuut akuerineqassappat Nunavumi tusilartut atugarisaat pitsannguallassapput. Innuttaasullu ussersuutinik pikkorissartinneqarsinnaalissallutik.

Nunatsinni danskit tusilartut ussersuutai atorneqartarput. Kulturerput aallaavigalugu immikkut kalaallit ussersuutaat aamma atorneqartarput, soorlu tikaagulluk, siku il.il. ussersuutit immikkuullarissut CD-ROM-inngorlugit ukiut arlallit matuma siornagut saqqummersitsisoqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat