Naggueqatitta misileraataasimanerat takutinneqarpoq
Naggueqatigiit Inuit nukappiaqqat inuusuttut pingasut filmimi oqaluttuarineqarput, taakku angerlarsimaffimminnit 1960-ikkut aallartinneranni peersinneqarput, Canadamilu illoqarfiit pingaarnersaannut, Ottawamut, nuutinneqarlutik. Naggueqatigiit Inuit katillugit 30-t angerlarsimaffimminniit taamani peersinneqarput, Ottawamullu nuutinneqarlutik, ilinniagaqariarlutik namminneq najukkaminnut uterlutik pisortatut sulilernissaat siunertaalluni.
Eskimuunillu misileraaneq tassuuna iluatsilluarpoq. Filmimi pisimasunik tunngavilimmi nukappiaqqat pingasut inuttaritinneqartut tamarmik inuiaqatigiinni nuimasunik atorfeqalerput. Tamannali nukappiaqqat inuunerannut akisoqaaq.
- Ilaquttatsinnut attaveqarunnaarpugut, oqaatsivut puigorpavut, uteramalu angajoqqaakkaluunniit oqaloqatigisinnaanngilakka. Naggueqatigiinnit Inunnit kingoqqisuunera naggataagut kanngusuutigilerpara, misilinneqarpormi eskimuut atugartuunngorsarneqarsinnaanersut, misiliutaannartut atorneqarpugut, Peter Ittinuar, inuunermi ingerlasimaneranik filmimi oqaluttuartoq, oqarpoq. Peter Ittinuar naggueqatigiinni Inunni siullersaalluni Canadami Inatsisartunut qinigaavoq.
Nukappiaqqat ilaat marluk aamma oqaluttuarput, pisortatut inuiaqatigiinni atorfigissaaraluarlutik meeraallutik nuutsitaasimanertik pissutigalugu tarnimikkut nappaarsimalersimallutik, imigassamik ajornartorsiuteqalersimapput, aappariinnerat ingerlanerlussimavoq inatsisinillu unioqqutitsiuarsimallutik.
- Inuunerma oqaluttuassartaata oqaluttuarinissaa kanngugalugu ukiorpassuarni oqaluttuarineq sapileqqasimavara, Zebedee Nungaq oqarpoq, nangillunilu:
- Pisortatut sulisimavugut - tamannalu ajunngilaq. Tamattali tarnikkut eqqissiviitsuusimavugut, tamannalu qaangerniapiloorsimallutigu.
Nukappiaqqat illoqarfimmut inunngorfimminnut uteramik taagorneqarput "Nukappiaqqat qaamasumik amillit Ottawameersut". Filmimili ilitsersuisoq, Barry Greenwald, ima oqarpoq:
- Quiassuarnertaa unaavoq atorfillit pissaaneqarpallaartut, inuusuttut ilinniagarnissaannik angusaqarusutut, takorloorsimanngimmassuk nukappiaqqat inersimasunngorunik politikkikkut ingasattajaarniartunngornissaat, nunap inuiisut pisinnaatitaaffimminnik tigumminnerusuttut, Barry Greenwald nutaarsiassaqartitsivimmut AFP-mut oqarpoq.
