Naggueqatitta inuusuttaasa inuuneq eqitaarpaat
Naggueqatigiit inuusuttaasa nunaqqatitik imminut toqussimasorpassuit ullumi eqqaaniarpaat. Tamanna pivoq Canadami inatsisartut illorsuata eqqaani innerup qamitsaaliukkap sioraani. Ilutigitilluguttaaq siunertaavoq naggueqatigiit Inuit akornanni, ingammik inuusuttut akornanni pinaveersaartitsinissamut eqqaaniaaneq isumassarsiorfiussasoq. Atorfissaqartinneqarporlumi.
Canadami naggueqatigiit Inuit akornanni imminut toquttartut, Canadamiunut allanut naleqqiullugit aqqanileriaammik amerlanerupput aamma naggueqatigiit Inuit akornanni 30-t ataallugit ukiullit akornanni, inuit quliugaangata arfineq pingasut imminut toquttarput.
Canadami naggueqatigiit Inuit inuusuttut suliniaqatigiiffiat, The National Inuit Youth Council, 2003-mili inuusuttut akornanni imminut toquttarneq pinaveersaartinniarlugu, tigussaasumik suliniuteqarsimavoq.
Suliniaqatigiiffik nunap immikkoortuini sisamani, Nunatsiavummi, Nunavimmi, Nunavummi aamma Inuvialunni naggueqatigiinnik inunnik sullissisuuvoq. Suliniaqatigiiffiup soorlu taaneqartutuut "inuunermik nuannaarutiginneq" sulinerminni aallaavigaat, allatut oqaatigalugu nuannersorpassuit inuunerup nassatarisinnaasaasa pingaartinnerisigut aamma ajornartorsiutinik nikallunganernillu qaangiisinnaanermik immikkut pingaartitsineq aqqutigalugit, taamaalilluni inuunerup nuannersortaannut anngussinnaaneq aqqutissiuunneqassammat.
Taamaattumik suliniaqatigiiffik ukiut tamaasa inuusuttunik ikiuiniarluni Canadami nunaqarfippassuarni assigiinngitsunik aaqqissuussillutillu suliniuteqartarput.
Eqqaaniaanermi taagorneqartumi "Inuit Embrace Life", tassa "Inuit inuuneq eqitaarpaat"-mi suliniaqatigiiffiup præsidentia, Jennifer Watkins suliniaqatigiiffiup imminut toquttarneq akiorniarlugu sulinertik oqaluttuaraa. Erinarsortartoq tusaamasaq, Susan Aglukark eqqaaniaanermi erinarsorpoq, immaqalumiuna imminut toquttarneq alianaqisoq allatullu atornerluineq pillugit erinarsuusiai, taamaattorli inuunermik nuannaaruteqanermik akoqartinneqartut immikkut tulluuttuusut.
