Naggueqatitta ilinniartitaanerat nutarterneqalerpoq

Canadami naggueqatigiit inuit ilinniartitaanissaannut iliuusissaq, naggueqatigiit inuit tunngavisumik ilinniartitaanerannut allannguuteqangaatsiartussaq, maanna saqqummiunneqarpoq. Pilersaarutip pisortatigoortumik saqqummiunneqarnerani, Ottowami pisumi, kattuffiup Inuit Tapiriit Kanatami siulittaasup Mary Simonip nassuiaateqarnermini oqaatigaa, pilersaarut pingaarnerusunik qulinik innersuussuteqartoq. Innersuussutillu meeqqat atuarfiini tunngaviusumik atuartitsisarnernik allannguuteqartitsissapput.
Allattoq Jaaku Lyberth
juunip 19-at 2011 13:50

Ilinniartitaanermut periusissaq nutaaq pimoorunneqartoq,  ataatsimiititaliamit ukiut marluk suliarineqarpoq. Ataatsimiitialiami ilaapput Canadami nunap immikkoortuini naalakkersuisut sinniisuutitaat aamma Canadami Inuit kattuffiat Inuit Tapiriit Kanatami.

Ilinniartitaanermi suliniut naggueqatigiinnut inunnut iluaqutaasussatut neriuutigineqarpoq, ajunnginerusumik iluatsittumillu inuuneqalernissaat anguniarneqarmat.

Pilersaarut taaguuteqartinneqarpoq "Canadamiut siulliit -  Canadamiut siulliuullugit - Inuit ilinniartitaanissaannut naalagaaffiup iliuusissaa".

Pilersaarutip pisortatigoortumik saqqummiunneqarnerani, Ottowami pisumi, kattuffiup Inuit Tapiriit Kanatami siulittaasup Mary Simonip nassuiaateqarnermini oqaatigaa, pilersaarut pingaarnerusunik qulinik innersuussuteqartoq. Innersuussutillu meeqqat atuarfiini tunngaviusumik atuartitsisarnernik allannguuteqartitsissapput.

Meeqqat atuarfiini atuartitsisarnernit ilinniarnertuunngorniarluni atuarnerit ilanngullugit allannguuteqarfiussaaq. Tassani pineqarlutik naggueqatigiit inuit najugaqarfii Nunavut, Nunavik, Nunatsiavut aamma nunap immikkoortua Inuvialuit najugaat.

- Ilinniartitaanermik aaqqissuussineq uagut ineriartortissinnaasatsitut piumasarput saqqummiupparput, Mary Simon oqarpoq, nangillunilu:

- Pingaarnertut meeqqat inuusuttullu imminnut tatiginermik ilinniartinneqarnissaat siunertaraarput aamma inuit oqaasiisa kulturiatalu atorneqarnerisigut angerlarsimasutut misiginissaat, kiisalu tulluusimaarlutik ilisimasaminnik issittumi periarfissarpassuarnut tunniussisinnaanissaat aaqqissuussinermi nutaami siunertaraarput, Mary Simon oqarpoq.

Allattaatsip - naqinnernik atuisarnerup - naggueqatigiinni inunni tamani atorneqarsinnaasup atulernissaa innersuussutigineqartut pingaarnerit aapparaat, taamaaliornikkut Canadami inuit najugaqarfigisaanni nunap immikkoortuini sisamani atuarfinni atuartitsissutit ilinniartitsissutillu assigiimmik naqinnernik atuiffiusut atorneqartalissammata.

Innersuussutigineqartuni pingaaruteqartut ilagaattaaq Canadap issittortaani universiteteqalernissaaq, tassami nunat issittormiut arfineq-pingasuusut akornanni Canadap issittortaa kisiartaalluni universiteteqanngilaq.

Ullormiit ullormut allannguisoqarsinnaanngitsoq Mary Simonip ilisimaaralugu oqarpoq, kisiannili meeqqat inuusuttullu ajunnginnerusunik ilinniartitaanissaannut aningaasaliisoqartariaqarnerarpaa tamannalu aamma piffissaqarfigineqartariaqarnerarnerarlugu. Akilinermi ilanngutassiortorput Marianne Stenbæk ilisimatitsivoq.