Naggueqatitta filmiliarineqarnerat nersornaasitissutigaat

Canadami filminut akissarsiaritineqartartut akimanersaat sapaatip akunnerata naanerani agguaanneqarmata, Canadami naggueqatigiit Inuit pillugit filmiliaq ”The Necessities of Life” - Inuunermi pisariaqartitat - sisamanik akissarsitinneqarpoq.
Allattoq Lotte Holm
apriilip 06-at 2009 09:21

Isiginnaartitsisartoq qiperuisartorlu, Baffin Islandimiu, Natar Ungalaaq, filmimi pingaarnertut inuttaasoq, ukioq manna isiginnaartitsillaqqinnerpaatut Genie-mik taaguutilimmik akissarsitinneqarpoq, taamatuttaaq filmimik ilitsersuisoq, Benoit Pilon, Genie-nalluni.

Filmi, Inuktitut oqaasertalersugaasoq, Quebecs-imi filminik sapaatip akunnerani kingullermi akissarsititsisoqarmat arlalinnik aamma akissarsitinneqarpoq. Takornartat oqaasii atorlugit filmiliani torrallataanerpaatut Oscarinnattussatut aamma piukkunneqaraluarpoq, ajugaanngitsoorlunili.

The Necessities of Life-mi Inuk piniartoq aamma nukappiaraq Inuk oqaluttuarineqarput, Canadami tuberkolosertut napparsimmavianni 1950-ikkunni naapinnerat malittarineqarsinnaalluni.