Naggueqatitta filmiliaat Montrealimi nuannerineqarpoq

Montrealimi ukimoortumik filmfestivali ullumi aallartippoq. Festivalip ingerlanerani filmit takutinneqaqqaartussat oqallisaanerpaat ilagaat Akilinermi naggueqatitta ilaat piniartoq, piumasarinngisaminik kujataani Quebec-imukartariaqalersoq pillugu filmiliaq.
Allattoq Louise M. Kleemann
aggustip 21-at 2008 08:24

Filmimi 1950-ikkunni pisimasuutinneqartumi piniartoq, Tivii tuberkolosemik nappaateqarluni Quebecimi napparsimavimmut katsorsartikkiartortariaqalerpoq.

Tivii napparsimavoq, tuluttut paasisinnaanani ilaquttanilu ungaseqalugit – kiserliorpoq inoorusussuseerukkamilu toqunissi utaqqiinnalerpaa.

Napparsimmavimmi niviarsiap Tivii ajornartorsiornerani misiginneqatigalugu naggueqataa nukappiaraq, Kaki napparsimmavimmi allami uninngasoq Tiviip uninngavianut nuutsimmagu, marluullutik ilorraap tungaanut aallarput.

Nukappiaqqap, Kakip Tivii qallunaat pissusaannik ilinniartippaa – Tiviillu nukappiaraq naggueqatigiit Inuit inooriaasaannik oqaluttuuttarmagu, qallunaat inuillu silarsuaat ikaartarfiliortutullusooq ippaat.

- Filmimi oqaluttuarineqartoq kusanarlunilu inuummarissinarpoq, filmip ilitsersuisua, Benoît Pilons oqarpoq. Filmi atsersimavaa: ”Inuunermi pingaartitat”.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq