Naggueqatitta eqqumiitsuliaa akisoorsuaq

Allattoq Najaaraq Egede
apriilip 26-at 2006 11:15

Qiperugaq naggueqatitta sanaava akisunerpaaq Toronto-mi akitsorterussilluni tuniniaanermi tunineqarpoq.

Danskit aningaasanngorlugu 1.470.000 koruunit nalinganut tunineqarluni. Taama CBC news allappoq.

Taassuminnga eqqumiitsuliortoq Joe Talirunili 1893-mi inunngorpoq 1976-milu toqulluni. Pisisoq imminut ilisaritikkusunngilaq, qiperugarlu millionip aappaata affaanik akilerlugu pisiaa, 30 cm –nit annerunngilaq.

Qiperugaq ateqarpoq ”The Migration” eqqumiitsuliortup iluseq taanna arlaleriarlugu sanasarsimavaa, allanngortitertarlugulu. Eqqumiitsuliaq siornatigut misigisimasaminut tunngatippaa, meeraatilluni nunaqqatiminik umiusunik isiginnaarsimanerminut tunngatillugu.

Qiperukkap tunineqartup immikkuullarissutigaa inuit kaniinatut ilusilersorsimammagit aquttuallu uppittut, amaqqutulluuniit iluseqarluni.