Naggueqatitta atugaat pitsanngorsarniarpaat
Generalguvernørip David Johnstonip oqalugiaammini neriorsuutigaa, Inuvimmiit Tuktoyaktukimut aqqusineq pingaarneq ukiorpassuit sananeqareerluni uninngasimasoq kiisami naammassineqassasoq. Issittup kippasissuani Inuialunnut tamanna iluaqutaassaqaaq.
Neriorsuutigineqartunut aamma ilaavoq digitalikkut attaveqaqatigiinnerit pitsaanerulissasut, taamaalilluni Issittumi illoqarfinni nunaqarfinnilu 53-ini internet sukkanerulissaaq. Internetertarneq sumiiffippassuarni maannamut ajortorujussuusimavoq arriitsuaraalluniluunniit.
Ammaalluni oqalugiarnermi neriorsuutinut aamma ilaavoq, naggueqatitta Inuit pitsaanerusumik ilinniagaqarnerusalernissaat, aamma avatangiisit pitsaanerusumik illersorneqartalernissaat.
Canadami nagguteqatitta suliniaqatigiiffiat, Inuit Tapiriit Kanatami, oqarpoq, oqalugiaat neriorsuutillu nuannaarutigigitsik. Suliniaqatigiiffiulli ajuusaarnartippaa, silap pissusaata allanngoriartornera generalguvernørip eqqaanngimmagu, silallu pissusaata allanngoriartornerata Issittumi illoqarfinnut nunaqarfinnullu sunniutaasa qanoq iliorfigineqartariaqarnerat aamma eqqaanagu.
