Naggueqatitsinnik atornerluisarsimanerit tusarniaassutigaat
1960-ikkunniit 1980-ikkut tikillugit Canadami atuarfinni nerisaqarfiutigisuni naggueqatigiit Inuit Indianerillu meeqqat atuartut kinguaassiuutimikkut atornerlunneqartarnerat pillugu nuna tamakkerlugu paasiniaanermi, Ilumoortussaq aamma Saammaasseqatigiinnissaq pillugu Isumalioqatigiissitaq 2007-imi pilersinneqarpoq.
Canadap issittortaani illoqarfiit nunaqarfiillu avannarliit 19-it maanna Isumalioqatigiissitamit tusarniarneqarput.
Inukjuarmi marsip 15-ianni tusarniaaneq siulleq pivoq, kingusinnerusukkullu Kuujjuaq aamma Kangerlineq tikinneqarlutik. Illoqarfinni nunaqarfinnilu innuttaasut tusarniarneranni, meeraallutik qanoq misigisaqarsimanerinik oqaluttuartinneqarput, taamaattorli kikkunnut tamanut oqaluttuarnissaannik pinngitsaalineqaratik.
Inuit maanna utoqqalisut oqaluttuarneri imaannaanngitsuupput. Tassami ilaat aatsaat siullermeerlutik atornerlunneqartarsimanertik pillugu inoqatiminnut oqaluttuarput, taamaattumillu attortissimaqalutik nassuiaasarlutik. Angajoqqaaminnit, oqaatsiminnit kulturiminnillu avissaartitaasimanerminnik misigisimasatik, taamani meeraasut ilaasa oqaluttuaraat, ilaasali pillarneqartarsimanertik pinngitsaalisaallutillu atoqatigineqartarsimanertik oqaluttuaralugit.
Isumalioqatigiissitami ilaasortaq, Peter Irniq taamani meeraasut misigisaminnik oqaluttuaraangata tamatigut attortissimasaqaluni aamma qullipittarsimalluni Radioaviisimut oqaluttuarpoq. Taamani meeraasut maanna meeraat amerlaqisut pinerlunniartartuusut, Peter Irneq ilanngullugu oqaluttuarpoq. Inuusuttullu taakku Peter Irnirup maanna sullitarivai. Ilumoortup saqqummiunneqarnissaa, Canadap issittortaani tusarniaanerit siunertaraat, naggueqatigiit Inuit akornanni canadamiunut allanut isiginneriaaseq allanngortinneqassasoq pingaarnertullu meeqqanik atornerluisarnerit siunissami pinngitsoortinniarneqarnissaat anguniarneqarluni. Montrealimi suleqaterput Marianne Stenbæk taama tusagassaqartitsivoq.
